پی پی ن لیگ کا پنجاب میں سیاسی تعاون جاری رکھنے پر اتفاق
دونوں جماعتوں کی کوارڈینیشن کمیٹی کے اجلاس میں باہمی تعاون بہتر بنانے کی تجاویز پر تبادلہ خیال
مسلم لیگ (ن) اور پیپلز پارٹی نے پنجاب کی ترقی اور عوامی ریلیف کے لئے سیاسی تعاون جاری رکھنے پر اتفاق کرلیا۔
دونوں جماعتوں کی کوارڈینیشن کمیٹی کے اجلاس میں رہنماؤں نے باہمی تعاون بہتر بنانے کی تجاویز پر تبادلہ خیال کیا۔ پی پی رہنماؤں نے وزیر اعلیٰ پنجاب مریم نواز شریف کے صوبے اور عوام کی ترقی کے لئے اقدامات کو سراہا اور انکی حمایت کی۔
پیپلزپارٹی کی طرف سے حسن مرتضیٰ، ندیم افضل چن، حیدر گیلانی ملاقات میں شریک ہوئے جبکہ سینئر وزیر پنجاب مریم اورنگزیب نے وزیر اعلیٰ پنجاب کی نمائندگی کی۔ رہنماؤں نے وزیراعلیٰ پنجاب کی کسانوں، زراعت، نوجوانوں سمیت دیگر طبقات کی بہتری کے لئے اسکیموں میں مل کر آگے بڑھنے پر اتفاق کیا۔
ملاقات میں اتفاق کی گیا کہ حلقوں میں ترقیاتی اقدامات، نوجوانوں کی ہنرمندی، سولر سسٹمز کی عوام کو فراہمی میں بھی اشتراک عمل سے آگے بڑھا جائے گا۔ صوبے میں موسمیاتی چیلنجز سے نمٹنے، امن وامان یقینی بنانے، جدید آئی ٹی نظام کے فروغ پر موثر عمل درآمد کے لئے تعاون جاری رہے گا۔
مریم اورنگزیب نے وزیر اعلیٰ پنجاب کی جانب سے وفد کی آمد اور سیاسی تعاون جاری رکھنے پر پی پی پی کی قیادت اور رہنماؤں کا شکریہ ادا کیا۔ مریم اورنگزیب نے کہا کہ پیپلز پارٹی سمیت تمام اتحادی جماعتوں کو ساتھ لے کر چلنے کی پالیسی پر کاربند ہیں، پاکستان اور عوام کے مفادات کے لئے تمام اتحادی جماعتوں کے اتحاد اور تعاون کے جذبے کو سراہتے ہیں۔
حسن مرتضیٰ اور علی حیدر گیلانی کا کہنا تھا کہ اختلاف رائے ہمارا بنیادی حق ہے، مل کر عوامی ایشوز کو حل کرنے پر اتفاق رائے کرتے ہیں، تمام رکاوٹوں کو دور کرکے آگے بڑھنے میں ہی اتحادی حکومت کے ثمرات عوام کو ملیں گے۔