زمبابوے ٹی10 لیگ پاکستانی کرکٹرز کی شمولیت پر سوالیہ نشان لگ گیا

منتخب پاکستانی کرکٹرز میں شاہ نواز دھانی، آصف علی، حیدر علی، یاسر شاہ، محمد عرفان اور دیگر شامل ہیں (فوٹو: ایکسپریس ویب)

---

زمبابوے کے شہر ہرارے میں 21 ستمبر سے شیڈول زم ایفرو لیگ میں پاکستانی کرکٹرز کی شمولیت پر سوالیہ نشان لگ گیا کیونکہ پی سی بی قومی کرکٹرز کو این او سی دینے سے انکاری ہے۔

ذرائع کے مطابق زم ایفرو لیگ کے لیے 5 پاکستانی کرکٹرز کا انتخاب ہوا ہے جس میں شاہ نواز دھانی، آصف علی، حیدر علی، یاسر شاہ، محمد عرفان، شرجیل خان اور سلمان ارشاد شامل ہیں۔ شاہنواز دھانی، آصف علی اور حیدر علی اس وقت فیصل آباد میں ہونے والے پی سی بی چیمپیئنز ون ڈے کپ کی ٹیموں کا حصہ ہیں۔

پاکستان کرکٹ بورڈ نے تاحال قومی کرکٹر کو این او سی جاری نہیں کیا۔

مزید پڑھیں؛ زمبابوین ٹی10 لیگ؛ کئی پاکستانی شامل، معین خان کوچنگ کریں گے

پی سی بی حکام کا موقف ہے کہ زم ایفرو ٹی ٹین لیگ کو تاحال آئی سی سی سے منظوری نہیں ملی اس لیے این او سی کیسے دیا جا سکتا ہے۔ آئی سی سی کی طرف سے لیگ کو منظوری ملنے تک کسی قومی کرکٹر کو این او سی نہیں ملے گا۔

پی سی بی این او سی نہ دینے کی پالیسی پر قائم رہتا ہے تو پھر فاسٹ بولر محمد عرفان اور سلمان ارشاد ہی اس لیگ میں کھیل سکیں گے کیونکہ دونوں کھلاڑی اس وقت پی سی بی کے کسی کنٹریکٹ کا حصہ نہیں۔

محمد عرفان نے رابطے پر تصدیق کی ہے کہ وہ پی سی بی کے این او سی کے بغیر بھی اس لیگ میں کھیل سکتے ہیں۔

دوسری جانب، زم ایفرو ٹی ٹین لیگ کے ترجمان کا موقف ہے کہ زمبابوے کرکٹ بورڈ آئی سی سی کا فل بورڈ ممبر ہے اور اس نے لیگ کرانے کی اجازت دی ہے لہٰذا اب آئی سی سی کی منظوری کی ضرورت نہیں۔