انکم ٹیکس گوشوارے 30 ستمبر تک جمع کرائیں تاریخ میں توسیع نہیں ہوگی ایف بی آر
نان فائلرز کے موبائل فون سمز، بجلی یا گیس کنکشن منقطع کیا جا سکتا ہے، ایف بی آر
فیڈرل بورڈ آف ریونیو (ایف بی آر) نے ٹیکس دہندگان کیلئے 30 ستمبر 2024 تک کے مالی سال کے انکم ٹیکس گوشوارے جمع کروانے کی تاریخ کا اعلان کردیا ہے۔
ایف بی آر کے مطابق انکم ٹیکس ریٹرن فائل کرنے کی آخری تاریخ 30 ستمبر ہے اور اس میں کوئی توسیع نہیں کی جائے گی۔ اعلامیے میں بتایا گیا ہے کہ اب تک تقریبا 14 لاکھ 25 ہزار افراد نے مالی سال 2024 کے انکم ٹیکس گوشوارے جمع کرا دیئے ہیں۔
اعلامیے کے مطابق سالانہ 6 لاکھ روپے سے زیادہ آمدن والے افراد ٹیکس ریٹرن فائل کرنے کے پابند ہیں، گھر، پراپرٹی یا گاڑی کے مالکان کیلئے بھی انکم ٹیکس گوشوارے فائل کرنا ضروری ہے، مقررہ حد سے زیادہ آمدن والے کاروباری افراد بھی ٹیکس گوشوارے جمع کرانے کے پابند ہیں۔
ایف بی آرحکام کا کہنا ہے کہ نان فائلرز کے موبائل فون سمز، بجلی یا گیس کنکشن منقطع کیا جا سکتا ہے، نوٹس ملنے کے باوجود گوشوارے جمع نہ کرانے والوں کیخلاف قانونی کاروائی ہوگی، نان فائلرز کو وارننگ کے بعد بینک اکاوٴنٹس بھی منجمد کیئے جاسکتے ہیں۔