کوئٹہ:
بلوچستان اسمبلی کی نشست پی بی 8 سبی میں ضمنی انتخاب میں پیپلز پارٹی کے امیدوار سردار کوہیار خان ڈومکی نے فتح حاصل کرلی۔
ایکسپریس نیوز کے مطابق بلوچستان کے علاقے سبی کے حلقہ پی بی 8 میں ضمنی الیکشن ہوا، جس کے دوران پولنگ کا عمل صبح 9 سے شام پانچ بجے تک بغیر کسی وقفے کے جاری رہا۔
پولنگ کا وقت ختم ہونے کے بعد گنتی کا عمل شروع ہوا، حلقہ پی بی ایٹ سبی کے تمام 124 پولنگ اسٹیشنز سے موصولہ نتائج کے مطابق پیپلز پارٹی نے انتخاب میں واضح فتح حاصل کرلی، ان کے امیدوار سردار میر کوہیار خان ڈومکی 35 ہزار 716 ووٹ حاصل کرکے اول نمبر پر رہے۔
ان کے مقابلے میں آزاد امیدوار میر محمد اصغر خان مری موجود تھے جو 11 ہزار 949 ووٹ حاصل کرسکے۔
دریں اثنا پولنگ پُرامن ماحول میں ہوئی، سیاسی جماعت کے رہنما ایک دوسرے پر الزامات لگاتے اس دوران کوئی ناخوشگوار واقعہ پیش نہیں آیا۔