واشنگٹن:
معروف پاکستانی اداکارہ ریما خان اور ان کے شوہر دل کے ماہر ڈاکٹر طارق شہاب کی شادی کی 13ویں سالگرہ کی رنگا رنگ تقریب امریکی دارالحکومت واشنگٹن میں منعقد ہوئی۔ اس تقریب میں پاکستان کے سفیر سمیت متعدد اہم شخصیات نے شرکت کی اور جوڑے کو مبارکباد پیش کی۔
تقریب میں پاکستان کے سفیر رضوان سعید شیخ اور ان کی اہلیہ لبنیٰ شیخ سمیت امریکا اور پاکستان کے مشہور سماجی، تجارتی اور طبی شعبے کی نمایاں شخصیات موجود تھیں۔ تقریب کو خوبصورتی سے سجایا گیا تھا اور مہمانوں نے اسے ایک یادگار شام قرار دیا۔
ڈاکٹر طارق شہاب نے اپنی اہلیہ ریما کو عظیم انسان قرار دیتے ہوئے کہا، "ریما نے اپنی مشہور شخصیت ہونے کے باوجود ہمیشہ عاجزی اور محبت سے اپنے رشتے نبھائے ہیں۔"
اداکارہ ریما خان نے اپنے شوہر کے لیے محبت کا اظہار کرتے ہوئے کہا، "طارق میرے لیے زندگی کا سب سے بڑا انعام ہیں۔ وہ نہ صرف بہترین شوہر بلکہ میرے والد کے لیے بھی ایک عظیم انسان ثابت ہوئے۔"
تقریب میں موجود گلوکارہ شیری رضا نے اپنی سریلی آواز میں گیت پیش کیے اور مہمانوں کو محظوظ کیا۔