ڈیڈ پول کا مرکزی کردار ادا کرنے والے اداکار ریان رینالڈ نے اپنی اہلیہ بلیک لائیولی کی ساتھی اداکار کے خلاف جنسی ہراسانی کیس کے بعد پہلی پوسٹ شیئر کی ہے۔
اداکار ریان رینالڈ اپنی اہلیہ کے ہدایت کار جسٹن بالڈونی کے ساتھ قانونی تنازعے کے بعد سوشل میڈیا پر غیر فعال تھے اور ان کی جانب سے کسی قسم کی پوسٹ سامنے نہیں آرہی تھی۔
اداکار نے اپنی اہلیہ کے حالیہ تنازعے کے بعد سوشل میڈیا پر اپنی پہلی پوسٹ کی ہے، جو وائرل ہورہی ہے۔
48 سالہ ڈیڈ پول اسٹار نے انسٹاگرام کو سک کڈز فاؤنڈیشن کو عطیات کو فروغ دینے کےلیے استعمال کیا ہے۔ پوسٹ میں رینالڈ کی 8 سالہ بیٹی انیز کے ساتھ ڈیڈ پول اور کڈ پول کے لباس میں تنظیم کی حوصلہ افزائی کرنے والی ویڈیو شیئر کی گئی ہے۔
ویڈیو کے کیپشن میں رینالڈ نے اپنے دل کو چھو لینے والے اقدام کے ساتھ انکشاف کیا ہے کہ وہ اور لائیولی کرسمس کی شام تک پانچ لاکھ امریکی ڈالر تک کے عطیات حاصل کرنے کی کوشش کریں گے۔ انھوں نے مشکل وقت میں ضرورت مند خاندانوں کی مدد کرنے میں فاؤنڈیشن کے اہم کردار پر بھی روشنی ڈالی۔
یاد رہے کہ ریان رینالڈ کی اہلیہ بلیک لائیولی نے حال ہی میں اپنے ساتھی اداکار اور ہدایت کار جسٹن بالڈونی کے خلاف ایک قانونی شکایت درج کروائی تھی جس میں ان پر جنسی طور پر ہراساں کرنے کا الزام لگایا گیا تھا۔