بالی ووڈ میں پشپا جیسی فلم بنانے کے لیے ’دماغ‘ کی کمی ہے، انوراگ کشپ

بالی ووڈ کے مشہور اداکار انوراگ کشپ کا کہنا ہے کہ بالی ووڈ انڈسٹری میں پشپا جیسی فلم کو بنانے کیلئے دماغ کی کمی ہے۔

 بھارتی میڈیا رپورٹ کے مطابق انوراگ کشپ نے ایک مرتبہ پھر ہندی فلم سازوں اور انڈسٹری کی حالت پر اپنا سخت موقف دیا ہے۔ انوراگ نے ہندی فلمسازوں پر سخت تنقید کرتے ہوئے کہا ہے کہ بالی ووڈ میں کوئی بھی پشپا جیسی فلم نہیں بنا سکتا۔

ہالی ووڈ رپورٹر کو دیئے ایک حالیہ انٹرویو میں انوراگ نے کہا کہ فلم انڈسٹری جسے بالی ووڈ کہا جاتا ہے اس کے فلم بنانے والوں کے پاس پشپا: دی رائز یا پشپا 2: دی رول جیسا کچھ بنانے کے لیے 'دماغ' کی کمی ہے۔

انہوں نے کہا کہ ’وہ (بالی ووڈ فلمساز) نہیں سمجھتے کہ فلم سازی کیا ہوتی ہے، پشپا صرف سوکمار ہی بنا سکتا ہے۔ جنوبی بھارتی انڈسٹری میں فلم سازوں پر سرمایہ کاری کرتے ہیں اور انہیں فلمیں بنانے کے لیے بااختیار بناتے ہیں۔ یہاں، ہر کوئی ایک یونیورس بنانے کی کوشش کر رہا ہے‘۔

فلمساز نے کہا کہ ’کیا وہ اپنی یونیورس کو سمجھتے ہیں اور وہ اس میں کتنے معمولی ہیں؟ یہی انا ہے۔ جب آپ کائنات بناتے ہیں، تو آپ کو لگتا ہے کہ آپ خدا ہیں‘۔

یاد رہے کہ پشپا 2 تیلگو فلم انڈسٹری کی 2024 کی سب سے زیادہ کمائی کرنے والی فلم ہے جس نے بھارت سمیت دنیا بھر سے خوب کمائی کی ہے۔ اس فلم میں تیلگو سپر اسٹار الو ارجن اور رشمیکا مندانا نے مرکزی کردار نبھائے ہیں۔