اپنی منفرد شخصیت سے شہرت پانے والے کراچی کے اسسٹنٹ کمشنر ہاظم بنگوار کے بھارت میں بھی چرچے ہونے لگے۔
کراچی کے اسسٹنٹ کمشنر ہاظم بنگوار جنھوں نے اپنے فیشن میں دلچسپی کی وجہ سے بھی شہرت حاصل کی تھی، اب ان کے ذوق کے باتیں بھارت میں بھی ہونے لگی ہیں۔
بھارت میں مشہور شوبز شخصیات کی خبریں دینے والے مشہور پیپرازی وائرل بھایانی نے اپنے انسٹاگرام اکاؤنٹ پر ہاظم بنگوار کی ایک تقریب میں شرکت کی ویڈیو اپ لوڈ کی ہے۔
بھارت سے تعلق رکھنے والے وائرل بھایانی بھی ہاظم بنگوار کے فیشن سینس کو سراہنے والوں میں شامل ہوگئے ہیں۔
بھایانی نے اپنی شیئر کی گئی ویڈیو کے کیپشن میں لکھا ہے کہ ’’اسٹائل اور سبسٹینس کے ساتھ دقیانوسی تصورات کو توڑتے ہاظم بھنگوار! کراچی کے اسسٹنٹ کمشنر ہاظم بنگوار سے ملیں، جو صرف ایک لیڈر ہی نہیں بلکہ اسٹائل آئیکون، گلوکار اور نغمہ نگار بھی ہیں۔ یہ ثابت کرتا ہے کہ آپ ہر اس شعبے میں سبقت لے سکتے ہیں جس کے بارے میں آپ پرجوش ہیں‘‘۔
ہاظم بنگوار نے اسسٹنٹ کمشنر بننے کے بعد اپنے عوامی کاموں سے تو شہرت حاصل کی ہی تھی، لیکن ان کی وجہ شہرت ان کا منفرد انداز اور سیاست سے بالکل ہٹ کر فیشن میں دلچسپی رکھنا بنا تھا۔
اسسٹنٹ کمشنر کو ماضی میں بھی دنیا بھر سے سوشل میڈیا پر پذیرائی ملتی رہی ہے اور اب بھارت کے یوٹیوبرز اور وی لاگرز بھی ان کی صلاحیتوں کے معترف ہورہے ہیں۔ مذکورہ ویڈیو پر مداحوں نے ہاظم کےلیے نیک خواہشات کا اظہار کیا ہے۔