بالی ووڈ کی سینئر اداکارہ نینا گپتا نے انکشاف کیا ہے کہ جب ان کی بیٹی مسابا پیدا ہوئی تو ان کی آنٹی نے انہیں گھر سے نکال دیا تھا۔
اداکارہ نینا گپتا نے حال ہی میں ایک انٹرویو میں اپنی بیٹی مسابا گپتا کی ولادت کے بعد پیش آنے والے چیلنجز اور مشکلات کو یاد کرتے ہوئے ان کے بارے میں بتایا۔
انہوں نے بتایا کہ اس وقت وہ اپنی آنٹی کے ساتھ رہ رہی تھیں، لیکن بیٹی کی پیدائش کے بعد ان کی آنٹی نے آدھی رات کو انہیں اور ان کی نومولود بیٹی کو گھر سے نکال دیا تھا اور اس وقت ان کے پاس کوئی جائے پناہ بھی نہیں تھی۔
نینا نے بتایا کہ وہ دہلی سے 1980 کی دہائی کے اوائل میں ممبئی منتقل ہوئیں اور ہمیشہ اپنی رہائش کے لیے فلیٹس خریدنے کو ترجیح دی۔ انہوں نے ایک موقع پر اپنا اپارٹمنٹ فروخت کر کے ایک نئے بلڈر کے پروجیکٹ میں تھری بی ایچ کے فلیٹ بک کرایا تھا، جس کے باعث ان کے پاس باقی رقم ختم ہو چکی تھی۔ جب ان کی آنٹی نے انہیں نکال دیا تو وہ بے گھر ہو گئیں، اور ان کے لیے حالات انتہائی مشکل ہو گئے۔
انہوں نے بتایا کہ انہوں نے اسی بلڈر سے رابطہ کیا جس کے پروجیکٹ میں انہوں نے سرمایہ کاری کی تھی، اور اپنی صورتحال بیان کرتے ہوئے رقم کی واپسی کی درخواست کی۔ جس پر بلڈر نے فوری طور پر تمام رقم واپس کر دی، جس سے نینا نے آرام نگر میں ایک نیا گھر خرید لیا اور اپنی بچی کے ساتھ وہاں منتقل ہوگئیں۔
یاد رہے کہ نینا گپتا اور لیجنڈری کرکٹر سر ویوین رچرڈز کے درمیان قریبی تعلقات تھے جس کے بعد ان دونوں کی بیٹی مسابا گپتا پیدا ہوئی، جو آج بھارت کی ایک معروف فیشن ڈیزائنر ہیں۔