جنوبی بھارتی فلموں کے اسٹار رام چرن اور بالی ووڈ کی معروف خوبرو اداکارہ کیارا اڈوانی کی 10 جنوری کو ریلیز ہونے والی فلم ’گیم چینجر‘ بدقسمتی سے سائبر حملوں اور لیک ؤ کا شکار ہو گئی ہے۔
بھارتی میڈیا کے مطابق فلم کے ریلیز کے دن ہی 45 افراد کے ایک گروپ نے فلم کی غیر قانونی کاپی آن لائن لیک کر دی۔
فلم کی ٹیم کے مطابق، ریلیز سے قبل انہیں سوشل میڈیا پیغامات اور دیگر ذرائع سے دھمکیاں دی گئیں، جن میں بھاری رقم کا مطالبہ بھی کیا گیا۔ دھمکی دینے والوں نے مطالبہ پورا نہ ہونے پر فلم کے مناظر اور ایچ ڈی پرنٹ لیک کرنے کی دھمکی دی تھی۔
جبکہ فلم کی ریلیز سے دو دن پہلے، اہم مناظر اور ایچ ڈی ورژن سوشل میڈیا پر جاری کر دیے گئے جس سے فلم کو نقصان پہنچا۔
گیم چینجر کی ٹیم نے ان افراد کے خلاف سائبر کرائم پولیس میں شکایت درج کروا دی ہے اور اس معاملے کی مکمل چھان بین کی جا رہی ہے تاکہ یہ معلوم کیا جا سکے کہ آیا یہ گروہ اکیلا کام کر رہا تھا یا ان کے پیچھے کوئی اور قوتیں بھی شامل تھیں۔
علاوہ ازیں رام چرن کی فلم کے خلاف منفی پروپیگنڈہ سوشل میڈیا پر کیا گیا، جس کیخلاف بھی شکایت درج کی گئی ہے۔
واضح رہے کہ ’گیم چینجر‘ نے ریلیز کے چند دنوں میں مجموعی طور پر 105.7 کروڑ روپے کا بزنس کیا ہے۔