کراچی:
اقبال مارکیٹ پولیس نے اورنگی ٹاؤن میں وزیرستان پولیس کے اہلکار کے قتل میں ملوث ملزم کو گرفتار کرلیا۔
ایس ایس پی ویسٹ طارق الٰہی مستوئی کے مطابق 26 جنوری 2025 کو اقبال مارکیٹ تھانے کی حدود، سیکٹر ساڑھے گیارہ یعقوب آباد میں تیز دھار آلے کے وار سے نور رحمان کو قتل کیا گیا تھا۔
قتل کا مقدمہ الزام نمبر 19/2025 بجرم دفعہ 302/34 تعزیراتِ پاکستان کے تحت تھانہ اقبال مارکیٹ میں درج کیا گیا۔
ایس ایس پی ویسٹ کے مطابق، ایس ایچ او اقبال مارکیٹ نے ٹیکنیکل اور ہیومین انٹیلیجنس کی مدد سے کارروائی کرتے ہوئے ملزم محسن کو گرفتار کرلیا۔
گرفتار ملزم کے قبضے سے قتل میں استعمال ہونے والی چھری اور موبائل فون بھی برآمد کر لیا گیا۔ تفتیش کے دوران معلوم ہوا کہ مقتول نور رحمان اور ملزم محسن ایک ہی ڈمپر پر ڈرائیور اور کنڈکٹر کے طور پر کام کرتے تھے، اور ملزم نے ذاتی رنجش کی بنا پر مقتول کو قتل کیا۔
ملزم کو قانونی کارروائی کے بعد مزید تفتیش کے لیے تفتیشی حکام کے حوالے کر دیا گیا ہے۔