امریکا میں ملٹری ہیلی کاپٹر فضا میں ایک مسافر بردار طیارے سے ٹکرا گیا جس کے نتیجے میں دونوں میں خوفناک آگ بھڑک اُٹھی۔
عالمی خبر رساں ادارے کے مطابق تصادم کے فوری کے بعد لگنے والی آگ کے باعث مسافر بردار طیارہ اور ہیلی کاپٹر دریا برد ہوگئے۔
طیارے میں 64 افراد موجود تھے جب کہ امریکی ملٹری ہیلی کاپٹر میں 4 اہلکار سوار تھے۔ تمام افراد ملبے سمیت ڈوب گئے۔
امدادی کاموں کے دوران دریا میں سے 18 لاشیں نکالی جا چکی ہیں جب کہ دیگر کی تلاش کے لیے ماہر غوطہ خوروں کی ٹیم ریسکیو آپریشن کر رہی ہے۔
فوجی ہیلی کاپٹر اور مسافر بردار طیارے کے درمیان خوفناک تصادم کو کیمرے کی آنکھ نے محفوظ کرلیا۔ ویڈیو دیکھتے ہی دیکھتے سوشل میڈیا پر وائرل ہوگئی۔
ویڈیو میں دیکھا جا سکتا ہے کہ امریکی ملٹری ہیلی کاپٹر مسافر طیارے کی جانب بڑھ رہا ہے اور دونوں کے درمیان ہونے والے تصادم سے خوفناک آگ کے شعلے بلند ہوتے ہیں۔
ابھی تک یہ واضح نہیں ہوسکا کہ یہ محض ایک حادثہ تھا یا دہشت گردی کا کوئی عنصر بھی ملوث ہوسکتا ہے۔
مقامی میڈیا کے مطابق مسافر بردار طیارے نے کینساس کے شہر وکیٹا سے واشنگٹن کے لیے پرواز بھری تھی۔
امریکی فوجی ہیلی کاپٹر مسافر بردار طیارے سے دریائے پوٹومیک کے اورپر رن وے کے قریب ٹکرایا۔