لاہور:
شاہدرہ ریلوے اسٹیشن کے قریب لاہور سے کراچی جانے والی شالیمار ایکسپریس کی تین کوچز ڈی ریل ہوگئیں۔
ترجمان ریلویز کے مطابق ٹریک پر ٹرینوں کی آمدورفت عارضی طور پر بند ہوگئی، ریلوے افسراں اور عملے نے موقع پر پہنچ کر امدادی کام شروع کر دیا۔
ابتدائی اطلاعات کے مطابق کسی قسم کا جانی نقصان نہیں ہوا۔
سی ای او ریلوے عامر علی بلوچ نے ڈیریلمنٹ کی تحقیقات کا حکم دیتے ہوئے جلد از جلد ٹریک بحال کرنے کا حکم دے دیا۔
ٹرین حادثے کے باعث لاہور اور فیصل آباد سے کراچی، کوئٹہ سمیت دیگر شہروں کو جانے والی ٹرینوں کا شیڈول کر دیا گیا۔
قراقرم 42 ڈاؤن کو آج لاہور سے کراچی کے لیے براستہ ساہیوال چلایا جائے گا جو بروقت 3 بجے روانہ ہوگی۔ عام طور پر قراقرم ایکسپریس براستہ فیصل آباد کراچی جاتی ہے۔
فیصل آباد سے کراچی کے لیے آج قراقرم کے مسافروں کو ملت ایکسپریس اور رحمان بابا ایکسپریس میں ایڈجسٹ کیا جائے گا۔
ملت ایکسپریس 18 ڈاؤن کراچی کے لیے شام 5 بجکر 50 منٹ کے بجائے شام 7 بجکر 50 منٹ پر فیصل آباد سے روانہ ہوگی جبکہ رحمان بابا ایکسپریس 48 ڈاؤن کراچی کے لیے فیصل آباد سے رات 9 بجکر 40 منٹ پر بروقت روانہ ہوگی۔
پاک بزنس ایکسپریس 34 ڈاون کراچی کے لیے سہ پہر 4 بجے کے بجائے رات 8 بجکر 30 منٹ پر لاہور سے روانہ ہوگی۔
کراچی اور راولپنڈی سمیت دیگر شہروں کو جانے والی باقی تمام ٹرینیں اپنے مقررہ اوقات کار کے مطابق رواں دواں ہیں۔ ڈویژنل سپرنٹنڈنٹ ریلوے لاہور محمد حنیف گل کی ہدایت پر مسافروں کی سہولت کے پیش نظر پسنجر فیسیلی ٹیشن عملہ ہمہ وقت اسٹیشن پر موجود رہے گا۔
مزید معلومات اور اپڈیٹ کے لیے ریلوے انکوائری نمبر 04299070011 یا 117-042 پر رابطہ کریں۔