نگینہ خانم کی 11ویں برسی آج منائی جائے گی

بطورگلوکارہ فلمی کیریئر شروع کیا، اداکار لہری کے مدمقابل فلم ’’اولاد ‘‘میں پہلی بار اداکاری کی۔ فوٹو : فائل

---

ماضی کی نامور اداکارہ نگینہ خانم کی 11ویں برسی آج منائی جائے گی۔ اس سلسلے میں ان کے اہلخانہ کی طرف سے قرآن خوانی اور فاتحہ خوانی کا اہتمام کیا جائیگا۔

نگینہ خانم کا تعلق پشاور سے تھا۔ انھوں نے اپنے فلمی کیریئر کا آغاز بطور گلوکارہ کیا اور مختلف پشتو فلموں کے لیے ایک سو تیس گانے گانے کے علاوہ ایک سو سے زائد فلموں میں بھی کام کیا۔انھیں بطور اداکارہ ایس ایم یوسف نے اپنی فلم ''اولاد'' میں متعارف کرایا ان کے مدمقابل اداکار لہری تھے۔ نگینہ خانم نے کئی پشتو فلموں میں بدرمنیر کی والدہ کا کردار ادا کیا اور اس کردار کے لیے وہ پشتو فلموں کا اسی طرح ایک لازمی حصہ سمجھی جاتی تھیں جس طرح پنجابی فلموں میں اداکارہ بہار بیگم سمجھی جاتی ہیں۔

بطور اداکارہ نگینہ خانم کی آخری فلم ''مہندی والے ہاتھ ''تھی ۔نگینہ خانم نے گلوکاری اور اداکاری کے علاوہ خود بھی پانچ فلمیں بنائیں۔ ان میں سے ایک فلم ''جینے دو'' اردو زبان جب کہ باقی پشتو میں تھیں۔ نگینہ خانم نے فلم انڈسٹری میں متعدد فلموں میں کردار نبھائے اور انھوں نے کئی اداکاراؤں کو بھی متعارف کرایا۔ نگینہ خانم کو 24 ستمبر 2003 ء میں ان کی رہائشگاہ پر قتل کردیا گیا تھا۔ نگینہ خانم کے صاحبزادے نواز خان آج بھی فلم انڈسٹری اور ٹی وی کے جانے پہچانے اداکار ہیں اور متعدد فلموں، ڈراموں اور وڈیوز میں کام کر چکے ہیں۔