پاکستان امریکی ویزا لاٹری DV2016 پروگرام میں شامل نہیں

منتخب ا فراد ویزے کیلیے کوالیفائی نہ کرسکے توبھی 50 ہزار افراد کا کوٹا مکمل کیا جائیگا۔ فوٹو: فائل

---

امریکا میں ویزا لاٹری DV2016 پروگرام کے تحت دنیا بھر سے 50 ہزار افراد اور ان کے اہلخانہ کو امیگریشن دی جائے گی۔

امریکی محکمہ خارجہ کی جانب سے ڈی وی گرین کارڈ پروگرام کے تحت یکم اکتوبر سے شروع ہونیوالی آن لائن درخواستوں کا حصول3 نومبر تک جاری رہے گا،تاہم اس پروگرام میں پاکستان، بھارت، بنگلا دیش اور چین کو شامل نہیں کیا گیا، البتہ افغانستان کے شہری امریکا میں رہائش اختیار کرنے کیلیے درخواست دینے کے اہل ہوں گے، ویزا لاٹری پروگرام میں ایران، عراق ، سعودی عرب،اسرائیل، جاپان، اور شمالی کوریا کے باشندے بھی قسمت آزمائی کر سکیں گے۔

امریکا میں آبادی کے توازن کوبرقرار رکھنے کیلیے یورپ سے برطانیہ اور شمالی امریکا سے کنیڈا اور میکسیکو کے شہری اس پروگرام سے مستفید نہ ہوسکیں گے، پروگرام میں دی جانے والی سہولت کے مطابق امریکا میں رہائش پذیر افراد کو بھی انٹری فارم جمع کرانے کی اجازت ہوگی جبکہ خاندان کا ہرفرد ذاتی حیثیت میں درخواست جمع کراسکے گا،کامیابی کی صورت میں اس کے اہلخانہ بھی امریکی امیگریشن حاصل کریں گے، رواں ویزا لاٹری پروگرام میں دلچسپ امر یہ ہے کہ درخواست گزارکوایک ہی نشست کے60 منٹ میں آن لائن انٹری فارم جمع کرانا لازمی ہوگا۔