بھارت جاکر کام کرنے والے فنکاروں کو ہندو انتہا پسندوں کی دھمکیاں

بھارتی انتہا پسند تنظیموں کی طرف سےدی جانےوالی دھمکیوں کےباعث بالی ووڈ میں کام کرنےوالےبہت سےپاکستانی فنکارخوفزدہ ہیں۔ فوٹو : فائل

---

بھارت میں بی جے پی کی حکومت بننے کے بعد مختلف انتہا پسند تنظیموں کی طرف سے دی جانیوالی دھمکیوں کے باعث بالی ووڈ میں کام کرنے والے بہت سے پاکستانی فنکار خوفزدہ ہیں، حالیہ چند ماہ کے دوران متعدد پاکستانی فنکاروں کو دھمکیاں دی گئیں۔

ان سے کہا گیا کہ وہ اپنی سرگرمیاں پاکستان تک محدود رکھیں، انھیں بھارت میں کام کرنے کی اجازت نہیں دی جائے گی،ان دنوں پاکستان کے متعدد فنکار بھارتی فلموں اور ڈراموں میں کام کررہے ہیں جب کہ بھارت میں پاکستانی فنکاروں کی بھی زبردست پزیرائی ہورہی ہے۔

فنکاروں نے پاکستانی حکومت سے کہا ہے کہ وہ بھارت جاکر کام کرنے والے فنکاروں کی زندگیوں کا تحفظ یقینی بنانے کے لیے سفارتی سطح پر ٹھوس اقدامات کرے، دوسری صورت میں پاکستان میں دکھائی جانے والی بھارتی فلموں کا مکمل بائیکاٹ کیا جائے گا،انھیں پاکستان میں نمائش کی اجازت نہیں دی جائے گی۔