رینجرز کے بیان پر وزیراعلیٰ سندھ اور زرداری نے وزیراعظم سے شکایت کی ذرائع

وزیراعظم نے کراچی میں ٹارگٹڈآپریشن کے اگلے مرحلے کی منظوری دے دی ہے، ذرائع۔ فوٹو : این این آئی

---

وزیراعلیٰ سندھ قائم علی شاہ نے وزیراعظم نوازشریف سے ملاقات میں سندھ رینجرز کی شکایت کی ہے۔

باخبرذرائع کے مطابق وزیراعلیٰ نے کہا کہ رینجرز بیانات دے کر اپنی حدود سے تجاوزکررہی ہے،اسے وفاق کی صوبے میں مداخلت سمجھیں گے۔ انھوں نے مطالبہ کیا کہ رینجرز کو بیانات دینے سے روکا جائے۔ ذرائع نے بتایا کہ وزیراعظم نے کراچی میں ٹارگٹڈآپریشن کے اگلے مرحلے کی منظوری دے دی ہے۔ ڈی جی رینجرز کی فہرست میں شامل 20 سے زائد بااثر شخصیات کے خلاف کارروائی کا حکم دے دیا گیا ہے۔ دوسری طرف وزیراعلیٰ سندھ نے وزیراعظم کو آصف زرداری کا پیغام پہنچایا کہ سندھ میں تصادم کی سیاست سے گریز کررہے ہیں۔

ایسا ماحول نہ بنایا جائے جس سے سیاسی جماعتوں اور قانون نافذ کرنے والے اداروں میں کشیدگی ہو۔ وزیراعلی نے رینجرز کی پریس ریلیز پر بھی تحفظات کا اظہار کیا کہ جب وزیراعلیٰ ہاؤس سے اپیکس کمیٹی کی پریس ریلیز جاری کی جا چکی تھی تو پھر تین دن بعد رینجرز نے پریس ریلیز کیوں جاری کی؟۔ پریس ریلیز میں سندھ کی سیاسی جماعتوں کو دہشتگرد بنا کر پیش کیا گیا۔