ماڈل ایان نے اڈیالہ جیل میں اپنی کتاب اسیر صیاد کے 100 صفحات مکمل کرلیے

رمضان المبارک میں عبادت میں زیادہ وقت مصروف ہونے کی وجہ سے کتاب کوزیادہ وقت نہیں دے پارہی ہیں۔ فوٹو: فائل

---

خوبروماڈل ایان علی کی ضمانت کی درخواست پر سرکاری وکیل آج (پیر کو) ہائیکورٹ میں جواب داخل کرائیںگے جبکہ ماڈل کی کتاب کی اشاعت کے لیے بعض پبلشرز اداروں نے ایان علی سے رابطہ کیا ہے تاہم انھوں نے کتاب مکمل ہونے تک کوئی بھی جواب دینے سے معذرت کی ہے۔

ذرائع نے بتایاہے کہ ماڈل ایان علی نے اڈیالہ جیل میں 100دن مکمل کرنے کے ساتھ ساتھ اپنی کتاب اسیرصیاد کے 100صفحات بھی مکمل کر لیے ہیں ، رمضان المبارک میں عبادت میں زیادہ وقت مصروف ہونے کی وجہ سے کتاب کوزیادہ وقت نہیں دے پارہی ہیں،100صفحات میں انھوں نے اپنے بچپن لڑکپن کے بعض واقعات بھی بیان کیے ہیں اور خاص طور پر گزشتہ 5سے 10سال کے حالات زندگی کے بارے میں خصوصی طورپرواقعات کاتذکرہ بھی کتاب کاحصہ ہو گا ۔ذرائع کا کہنا ہے کہ جیل انتظامیہ نے جیل سے عدالت لے آنے لے جانے والی گاڑی کی خریداری کے بارے میں ماڈل کو تاحال کوئی جواب نہیں دیاجبکہ ماڈل ایان علی روزانہ کی طرح صدقہ خیرات جاری رکھے ہوئے ہیں۔