ہلہ گلہ کا آئٹم سانگ ’’ٹھمکا‘‘ چیلنج سے کم نہیں تھا ماہ نور

فلم میں آئٹم سانگ کرنیوالی پہلی اسٹیج اداکارہ ہوں،مستقبل میں آئٹم سانگ کے ساتھ کریکٹر ہوا تو ضرور کروں گی،انٹرویو۔ فوٹو: فائل

---

فلم ''ہلہ گلہ'' میں میرے آئٹم سانگ کو پسند کیا جارہا ہے، اسٹیج کی پہلی فنکارہ ہوں کہ جس پر فلم کے لیے آئٹم سانگ فلمایا گیا۔

نمائندہ ایکسپریس کو انٹرویو دیتے ہوئے اداکارہ ماہ نور کا کہنا تھا کہ یہ میرے لیے کسی چیلنج سے کم نہیں تھا کیونکہ بالی ووڈ میں کترینہ کیف، ملائکہ اروڑا اور کرینہ کپور سمیت دیگر اسٹارز کے آئٹم سانگز نے میوزک انڈسٹری میں جو دھوم مچائی ہماری فلموں میں فلمائے گئے آئٹم سانگز ان کی طرح کی مقبولیت حاصل نہیں کرسکے۔ ہمارے پروڈیوسرز اور ڈائریکٹرز نے ان آئٹم سانگز کے لیے ژالے سرحدی، مہوش حیات، عائشہ عمر، متیرا جیسی معروف ٹی وی ماڈلز اور اداکاراؤں کی خدمات حاصل کیں۔ جب فلم ''ہلہ گلہ '' کے لیے ڈائریکٹر کامران اکبر خان اور پروڈیوسر محمد حنیف نے آئٹم سانگ ''ٹھمکا'' کے لیے رابطہ کیا تو میں فورا نے یہ آفر قبول کرلی۔

ماہ نور نے کہا کہ آئٹم سانگ فلم کے دوسرے گانوں کے مقابلے میں ایک اسپیشل پراڈکٹ کی طرح ہے ،جس میں ایکٹر یا ایکٹریس کواپنی بہترین پرفارمنس دینا ہوتی ہے۔میں نے بھی اپنے بہترین پرفارمنس دینے کے لیے بھرپور محنت کی اور باکس آفس پر جس طرح سے پذیرائی مل رہی ہے اس پر اپنے پرستاروں کی بے حد مشکور ہوں ۔

ایک سوال کے جواب میں ماہ نور کا کہنا تھا کہ کراچی ہو یا لاہور فلم تو پاکستانی ہی کہلائے گی، ویسے بھی کراچی میں پہلی مرتبہ کام کرنے کا تجربہ اچھا رہا ، وہاں لوگ کے جس طرح سے فلم کے لیے محنت اور کوشش کر رہے ہیں انشاء اللہ ہماری فلم انڈسٹری دوبارہ سے بحال ہونا شروع ہوگئی ہے۔انھوں نے مزید بتایا کہ یہ آئٹم سانگ میرا پہلا نہیں اس سے قبل اقبال کشمیری کی فلم ''شیردل'' میں کرچکی ہوں مگر زیادہ رسپانس اس کا ہی ملا ہے ۔ مستقبل میں آئٹم سانگ کے ساتھ اگر کریکٹر ہوا تو ضرور کروں گی۔