سوہا کی 1984کے سکھ مخالف فسادات پر فلم ’’31اکتوبر‘‘ پرسنسر نے اعتراض لگا دیا

ریلیز کی تاریخ انتہائی اہم ہے ایک ہی مرتبہ تمام اعتراضات دور کرکے فلم کو دوبارہ سرٹیفکیٹ کیلیے جمع کروایاجائے گا،ذرائع فوٹو : فائل

---

HARIPUR: بالی ووڈ اداکارہ سوہا علی خان اور اداکار ویر داس کی 1984 میں سکھ مخالف فسادات پر بنائی جانیوالی فلم 31 اکتوبرسنسر مسائل کا سامنا کرنا پڑ گیا ہے جس کی وجہ سے فلم کی ریلیز 30اکتوبر سے آگے لے جائے جانے کا امکان ہے ۔

بھارتی میڈیا کے مطابق فلم کو چند روز قبل سنسر بورڈ کے سامنے سرٹیفکیٹ کے حصول کے لیے جمع کروایاگیاجہاں اس پر اعتراضات لگادیے ہیں۔ زرائع کا کہنا ہے کہ سنسر بورڈ کی طرف سے فلم سے متعدد مناظر نکالنے کا کہا گیا ہے اور فلم کے پروڈیوسرز اور ہدایتکار سوچ میں پڑگئے ہیں کہ ان مناظر کو کس طرح نکالا جائے کہ فلم کا اصل مرکزی خیال متاثر نہ ہو۔زرائع کا کہنا ہے کہ فلم جو 30اکتوبر کو ریلیزکی جانی ہے اور تاریخ پر بھی اعتراض کیا گیا ہے ۔

فلم کے ہدایتکار شیوجی لوتن پٹیل کے قریبی ذرائع کا کہنا ہے کہ فلم کا موضوع بہت حساس ہے اور سنسر بورڈ نے اس کے کچھ مناظر کم کرنے کا کہا ہے ہم سنسر کی طرف سے دی گئی تجاویز کے مطابق کہانی میں تبدیلی کرنے کی کوشش کررہے ہیں تاکہ ہم جو کہانی سینما اسکرین پر دکھانا چاہتے ہیں کسی بھی طرح متاثر نہ ہو ۔

زرائع کا مذید کہنا ہے کہ فلم ساز کی پوری کوشش ہے کہ ایک ہی مرتبہ تمام اعتراضات دور کرنے کے علاوہ دیگر چیزیں جن کی وجہ سے بعد میں بھی رکاوٹ پیدا ہوسکتی ہے ختم کرکے فلم کو دوبارہ سنسر بورڈ کو سرٹیفکیٹ کے حصول کے لیے جمع کروا دیا جائے گا کیونکہ فلم کی ریلیز کی تاریخ انتہائی اہمیت رکھتی ہے اور اگر یہ نکل گئی تو شاید فلم زیادہ اچھا بزنس نہ کرسکے۔

واضح رہے کہ فلم 31 اکتوبر1984 میں ا س وقت کی وزیراعظم اندراگاندھی کے قتل اور اس کے بعد سکھوں کے قتل عام پر بنائی گئی ہے جس میں ایک ایسے خاندان کو دکھایا گیاہے جو فسادات کے دوران اوراس کے بعد اپنی بقا اور بحالی کی جدوجہد کرتا ہے ۔