خاتون مسافر کی بددعا سے خوفزدہ پائلٹ نے جہاز واپس موڑ لیا

جہاز میں آتے ہی اس نے مزید شراب کا مطالبہ شروع کردیا،جب عملے کی طرف سے معذرت کی گئی تو خاتون نے مغلظات بکنے شروع کردیے:فوٹو : فائل

---

عام طور پر جہاز میں کوئی تکنیکی خرابی ہوجائے یا دہشت گردی کا خطرہ ہو تو پائلٹ کوپرواز جاری نہ رکھنے کا فیصلہ کرنا پڑ جاتا ہے لیکن کیوبا سے برطانیہ کے لیے روانہ ہونے والی ایک پرواز کو ایک خاتون مسافر کی بددعا کی وجہ سے واپس ائیرپورٹ پر لوٹنا پڑگیا۔

آن لائن اخبار ''ڈیلی میل کے مطابق تھامس کک ائیرلائن کی پرواز ٹی سی ایکس 175 کیوبا کے شہر کائیو کو سے برطانیہ کے شہر مانچسٹر کے لیے روانہ ہوئی ہی تھی ایک خاتون نے ایسی بددعا کر دی کہ عملہ سخت گھبرا گیا اور پائلٹ نے ٹیک آف کے لیے بڑھتے ہوئے جہاز کو واپس موڑلیا۔بتایا گیاہے کہ پرواز کے ایک مسافر 50 سالہ ڈیوڈ میڈیسن لی نے بتایا کہ یہ خاتون روانگی سے قبل وی آئی پی لاؤنج میں شراب نوشی کررہی تھی۔

جہاز میں آتے ہی اس نے مزید شراب کا مطالبہ شروع کردیا اور جب عملے کی طرف سے معذرت کی گئی تو خاتون نے مغلظات بکنے شروع کردیے اور بددعا دی کہ طیارہ راستے میں ہی گر کر تباہ ہوجائے۔ یہ بات سن کر نہ صرف مسافر سخت گھبراگئے بلکہ عملہ بھی پریشان ہوگیا اور کپتان کو اطلاع کی گئی۔ کپتان نے بددعا کی خبر ملتے ہی ٹیک آف کے لیے بڑھتے ہوئے طیارے کو واپس موڑلیا۔