فیس بک نے ISIS کا اکاؤنٹ معطل کرنے پر معافی مانگ لی

فیس بک نے اس واقعے کو ایک غلطی قرار دیا ہے،فوٹو:فائل

---

سماجی رابطے کی معروف ویب سائٹ فیس بک نے آئسیس(isis) نامی ایک لڑکی کا ذاتی اکاؤنٹ معطل کرنے پر اپنی غلطی تسلیم کرتے ہوئے معافی مانگ لی۔

غیر ملکی خبر ایجنسی کے مطابق امریکی ریاست کیلی فورنیا کے شہر سان فرانسسکو کی رہائشی انچالی آئسیس(isis) نے ٹوئٹر پر فیس بک لوگ ان پیج کا اسکرین شاٹ پوسٹ کیا جس میں دکھایا گیا تھا کہ فیس بک نے اس کے ذاتی اکاؤنٹ کو ناقابل استمال یا معطل کردیا ہے۔ آئسیس(isis) انچالی جو کہ ایک سافٹ ویئر ڈیولپر ہیں نے ٹوئٹر پر فیس بک facebook@ کو ٹیگ کرتے ہوئے ہوئے سوال کیا کہ اس کاذاتی فیس بک اکاؤنٹ آخر کیوں معطل کیا گیا ہے جب کہ آئسیس(isis) انچالی ان کا پورا نام ہے۔

@facebook why would you disable my personal account? MY REAL NAME IS ISIS ANCHALEE /facepalm

— Isis Anchalee (@isisAnchalee) November 16, 2015

انچالی کا کہنا تھا کہ شاید فیس بک انتظامیہ کا خیال ہے کہ میں ایک دہشت گرد ہوں ،اسی لیئے میں تصدیق کے لیئے اپنے پاسپورٹ کا اسکرین شاٹ انہیں بھجوا رہی ہوں اور اگراس کے بعد بھی میرا اکاؤنٹ بحال نہ کیا گیا تو یہ بالکل بھی اچھی بات نہیں ہوگی۔

Facebook thinks I'm a terrorist. Apparently sending them a screenshot of my passport is not good enough for them to reopen my account.

— Isis Anchalee (@isisAnchalee) November 17, 2015

 

دوسری جانب فیس بک کے ایک ترجمان نے اس واقعے کو ایک غلطی قرار دیتے ہوئے کہا کہ ان کے ایک یوزر کا نام شدت پسند تنظیم داعش یا (آئی ایس آئی ایل ) اسلامک اسٹیٹ آف عراق اینڈ دا لیونٹ سے ملتا جلتا تھا اور سوشل میڈیا پر ان کے حامی اس نام کا اکثر استعمال کرتے ہیں اور اسی وجہ سے جعلی اکاؤنٹس کے حوالے سے آنے والی شکایات کی وجہ سے یہ معاملہ پیش آیا جس پر ہم معافی چاہتے ہیں۔ترجمان کا یہ بھی کہنا تھا کہ اس معاملے کا تعلق ان کے ذاتی نام سے ہرگز نہیں اور ان کا اکاؤنٹ بحال بھی کردیا گیا ہے۔

Third time sending in my information is the charm I guess. I'm back in :) pic.twitter.com/m0demGZitw

— Isis Anchalee (@isisAnchalee) November 17, 2015

واضح رہے کہ عراق اور شام میں سرگرم شدت پسند تنظیم داعش کا نام میڈیا میں آئی ایس یا اسلامک اسٹیٹ استعمال کیا جاتا ہے جس کی وجہ سے آئی ایس آئی ایس نام کے متعدد افراد کو مشکلات کا سامنا کرناپڑا ہے۔داعش نے حال ہی میں پیرس پر ہونے والے حملوں کی ذمہ داری قبول کی ہے جب کہ اس پرعراق اور شام میں بڑے پیمانے پر مخالفین کو قتل کرنے کا بھی الزام ہے اسی وجہ سے عالمی سطح پر داعش کو دہشت گرد تنظیم قرار دیا گیا ہے۔رواں سال اگست میں سوشل میڈیا پر ایک آن لائن پٹیشن بھی جمع کی گی تھی جس میں آئسیس(isis) نامی افراد نے میڈیا سے مطالبہ کیا تھا کہ ان کا نام ایک دہشت گرد تنظیم کے لیئے نہ استعمال کیا جائے۔اس پٹیشن پر 56 ہزار سے زائد افراد نے دستخط بھی کیئے تھے۔

Can I get a "yes yes" to forever call them Daesh?

— Isis Anchalee (@isisAnchalee) November 17, 2015

 

آئسیس(isis) انچالی کا کہنا ہے کہ اکاؤنٹ بحال ہونے کے بعد اب اس کا خیال ہے کہ میڈیا میں دولت اسلامیہ کو آئی ایس کے بجائے داعش کے نام سے لکھا اور پکارا جانا چاہیئے تاکہ اس قسم کے واقعات دوبارہ پیش نہ آئیں۔