شوبز میں کامیابی لابی یا سفارش نہیں محنت سے ملتی ہے شازیہ شاہ

کامیڈی میوزیکل فلم میں معروف فنکاروں کے ساتھ مرکزی کردار نبھارہی ہوں،فلم کی شوٹنگز ابھی جاری ہیں،’’ایکسپریس‘‘سے گفتگو۔ فوٹو: فائل

---

KARACHI: کمپیئرنگ، ماڈلنگ اور اداکاری تینوں شعبوں میں اچھا رسپانس مل رہا ہے، ایک فلم سائن کی ہے جس کی شوٹنگ لاہور میں ایک ماہ سے جاری ہے۔

یہ باتیں ماڈل واداکارہ شازیہ شاہ نے نمائندہ ایکسپریس سے بات چیت کرتے ہوئے کیں ۔ شازیہ شاہ کا کہنا تھا کہ میرٹ اور محنت ہی کامیابی کا زینہ ہے، جس کے لیے آپ کو کسی لابی یا سفارش کی ضرورت ہی نہیں ہوتی۔ فلم ، ٹی وی اور فیشن انڈسٹری میں پسند نا پسند کو ہی ترجیح دی جارہی ہے، اس سے باصلاحیت ٹیلنٹ کو زیادہ مواقع نہیں مل رہے، مگر بلند حوصلے اور محنت پر یقین رکھنے والے اپنی منزل پر پہنچ ہی جاتے ہیں۔شازیہ شاہ نے کہا کہ میں کسی لابی میں شامل ہوئے بغیر اپنی پرفارمنس پر ہی آگے بڑھ رہی ہوں۔

اس وقت متعدد میگا ڈرامہ سیریلز کے علاوہ ایک ٹی وی شو کر رہی ہوں ۔ اس میں میری پرفارمنس کو بے حد پسند کیا جارہا ہے۔ پاکستانی فلم انڈسٹری کے سوال پر ان کا کہنا تھا کہ یہ بحالی کے بعد ابھی یہ ابتدائی مراحل میں ہے جس میں بہتری لانے کے لیے بہت محنت کی ضرورت ہے ۔ فلم میکر فی الحال تجرباتی فلمیں بنا رہے ہیں، میرے خیال میں یہ بھی ایک اچھی بات ہے کیونکہ فلم بین ابھی بہت ذہین اور ہوشیار ہوچکا ہے۔ وہ فلم کے پہلے سین کو دیکھ کر ہی اندازہ لگتا ہے کہ اس سے وہ انٹرٹین ہوگا یا نہیں۔ اب ان فلموں کو ہی کامیابی ملے گی جو فلم بینوں کی توقعات پر پورا اتریں گی۔

فلم بنانے کے ساتھ پبلسٹی بھی بہت ضروری ہوچکی ہے اس شعبے میں بھی ہمارا پیپرورک ابھی کمزور ہے۔ اپنی فلم کے حوالے سے ان کا کہنا تھا کہ اس میں لیڈنگ رول کر رہی ہوں جس کی لاہور کے مضافات میں پچھلے ایک ماہ سے شوٹنگ کروا رہی ہوں جس کی تفصیلات فی الحال بتانے سے منع کیا گیا ہے۔ بہرحال کامیڈی میوزیکل فلم ہے جس میں فلم اور ٹی وی کے معروف فنکار کام کر رہے ہیں۔ انشاء اللہ فلم کے حوالے سے بہت جلد ایک پریس کانفرنس کریں گے جس میں اس کی تفصیلات اور نمائش کے بارے میں میڈیا کو بتایا جائے گا۔