برآمدات میں جولائی تا اپریل259ارب ڈالر کمی

مارچ کے مقابلے میں اپریل میں برآمد1.15 فیصدکم، درآمد 8.49 اور تجارتی خسارہ17.68 فیصد زیادہ رہا،پی بی ایس فوٹو: اے ایف پی/فائل

---

پاکستان کی ایکسپورٹ رواں مالی سال کے ابتدائی 10ماہ میں 12.99 فیصد کمی سے 17ارب 32کروڑ 30لاکھ ڈالر رہ گئی جو گزشتہ مالی سال کی اسی مدت میں 19ارب 91کروڑ ڈالر تک پہنچ چکی تھی، اس طرح جولائی سے اپریل 2016 تک ایکسپورٹ میں قطعی طور پر 2ارب 58کروڑ70 لاکھ ڈالر کمی ہوئی۔

پاکستان بیورو شماریات (پی بی ایس) سے جاری کردہ اعدادوشمار کے مطابق گزشتہ 10 ماہ میں پاکستانی درآمدات 3.7 فیصد کی کمی سے 36ارب 33کروڑ 80لاکھ ڈالر رہی جو جولائی تااپریل 2015 میں 37ارب 73کروڑ 40لاکھ ڈالر رہی تھی، یوں اس دوران پاکستان کی تجارت کا خسارہ 17ارب 82کروڑ 40 لاکھ ڈالر سے 6.68 فیصد بڑھ کر 19ارب 1کروڑ 50 لاکھ ڈالر تک پہنچ گیا۔

اعدادوشمار کے مطابق اپریل 2016میں برآمدات سال بہ سال 13.42 فیصد کمی سے 1ارب 72کروڑ 20لاکھ ڈالر رہیں جو اپریل 2015 میں 1ارب 98کروڑ 90 لاکھ ڈالر رہی تھیں، گزشتہ ماہ درآمدات2.27 فیصد سال بہ سال بڑھ کر 3ارب 78کروڑ 60 لاکھ ڈالر سے 3ارب 87کروڑ 20لاکھ ڈالر ہوگئیں، یوں اپریل کی تجارت میں پاکستان کو 2ارب 15کروڑ ڈالر کا خسارہ ہوا جو گزشتہ سال کی اسی مدت میں 1ارب 79کروڑ 70 لاکھ ڈالر کے تجارتی خسارے سے 19.64 فیصد زیادہ ہے۔

پی بی ایس کے مطابق مارچ کے مقابلے میں اپریل میں برآمد1.15 فیصدکم، درآمد 8.49 اور تجارتی خسارہ17.68 فیصد زیادہ رہا، مارچ میں برآمدات 1ارب 74کروڑ 20لاکھ ڈالر، درآمدات 3ارب 56کروڑ 90لاکھ ڈالر اور تجارتی خسارہ 1ارب 82کروڑ 70 لاکھ ڈالر رہا تھا۔