انتقام لوگوں سے نہیں اپنے ’نفس‘ سے لیجئے

جناب، اس کم تر معاشرے کے نیچ لوگوں کا علاج ہی یہ ہے کہ انہیں پاؤں کی جوتی میں رکھو۔ غریب کو فری کرواو تو سر پر چڑھ کر بیٹھ جاتا ہے۔ ہر آدمی کو اس کی اوقات کے مطابق ہی ڈیل کرنا چاہئیے۔

نمک حرام اور احسان فراموشوں کے اس ملک میں جب تک آپ چھڑی ہاتھ میں لے کر اپنے ملازموں اور ملنے جلنے والوں کو بھیڑ بکریوں کی طرح نہیں ہانکیں گے کام نہیں چلے گا۔

جناب، میرے منہ جب کوئی لگتا ہے تو میں تو پہلے ہی خبردار کردیتا ہوں کہ تو جانتا نہیں میں کون ہوں؟ جب میرا نمبر آئے تو رونا مت۔ چیڑ پھاڑ کے رکھ دوں گا۔

عبداللہ تم بھی تو کچھ کہو، تم بھی تو معاشرے میں ایک خاص مقام رکھتے ہو۔ ایک اسٹیٹس ہے تمہارا۔ تم ظلم کرنے والوں کے ہاتھ کیسے کاٹتے ہو؟

بالکل ویسے ہی جناب، جیسے آپ لوگ کرتے ہیں۔ جب کوئی آدمی حد سے تجاوز کرجائے، جب کوئی ایسا تنگ کرے کہ آدمی کا انسانیت سے ہی یقین اُٹھ جائے، جب کوئی دشمنی کے اس معیار پر آجائے کہ ظلم کو شرمندگی ہوجائے۔ جب کوئی بھرے مجمع میں بہتان لگائے اور جھوٹ کے سہارے سوشل میڈیا پر آپ کو ذلیل کرنے کی مہم چلا دے تو غصہ تو آتا ہی ہے۔

جی، جیسے آپ۔ میں بھی سب سے پہلے اپنے نفس سے پوچھتا ہوں۔ تو جانتا نہیں میں کون ہوں؟ تجھے معلوم نہیں میری اوقات کیا ہے؟ میں گندگی کے قطرے سے وجود میں آیا۔ عمر بھر پیٹ میں غلاظت، دماغ میں فتور اور سینے میں کینہ لئے گھومتا رہا اور کچھ ہی عرصے میں قبر میں پہنچ کر کیڑوں کی غذا بن جاؤں گا۔

جب منکر نکیر سوالوں کی چھڑی سے ہانکیں گے تو کدھر جائے گا؟ جب عذاب کے فرشتے منہ توڑیں گے تو کِسے پکارے گا؟ آج سوال در سوال پوچھ کے دوسروں پر رعب قائم کر رہا ہے، جرح کرتا ہے۔ جب مالکِ کُل نے سوال پوچھ لیا تو کہاں سے جواب لائے گا؟

بھائی باز آجا۔ مظلوم مرجا، ظالم نہیں۔ معاف کردے، بھول جا، چھوڑ دے، بخش دے، جانے دے۔ آگے چل کہ زندگی پڑی ہے۔ اپنی فکر کر، مجمعے سے نکل، تنہائی میں آ۔ لوگ لذت ہوتے ہیں، لذتوں کا انجام بُرا ہے۔ تجھے تو اللہ کا ذکر کرنا ہے، تو وہ کر۔ جس کا ذکر کر رہا ہے وہ جانے اور بولنے والے۔

اگر آپ بھی ہمارے لیے اردو بلاگ لکھنا چاہتے ہیں تو قلم اٹھائیے اور 500 الفاظ پر مشتمل تحریر اپنی تصویر، مکمل نام، فون نمبر، فیس بک اور ٹویٹر آئی ڈیز اوراپنے مختصر مگر جامع تعارف کے ساتھ [email protected] پر ای میل کریں۔ بلاگ کے ساتھ تصاویر اورویڈیو لنکس۔