آپ کے جسم کو زہریلے مواد سے پاک کرنے والی غذائیں

اگر آپ معدے کی تیزابیت کا شکار ہیں تو بروکلی کو اپنی سلاد کا حصہ بنا لیں۔ فوٹو: فائل

---

جس طرح کے کھانے ہم آج کل کھاتے ہیں ان کی وجہ سے ہمارے جسم میں کئی طرح کے خطرناک مادے اکٹھے ہو جاتے ہیں جو مختلف قسم کی بیماریوں کا باعث بنتے ہیں۔ یہاں چند ایسی غذاؤں کا ذکر کیا جا رہا ہے جن کے استعمال سے آپ کا جسم ان خطرناک مادوں سے پاک ہوسکے گا۔

٭ہلدی: زمانہ قدیم سے ہی ہلدی کو انتہائی مفید پایا گیا ہے اور اب جدید تحقیق بھی اس نتیجہ پر پہنچی ہے کہ ہلدی کا استعمال انتہائی سودمند ہے کیونکہ اس میں انٹی آکسیڈنٹ اجزاء پائے جاتے ہیں جس سے جسم میں زہریلے مواد کو نکالنے میں مدد ملتی ہے۔ اس کے استعمال سے جگر کے زہریلے مادے ختم ہونا شروع ہوجاتے ہیں لہذا اس بات کو یقینی بنائیں کہ دن میں کم از کم ایک چائے کا چمچ ہلدی ضرور استعمال کریںگے۔

٭سیب: ایک سیب روزانہ رکھے توانا۔یہ محاورہ صرف زبانی بات نہیں بلکہ ماہرین صحت اس بات کو مانتے ہیں کہ آئرن سے بھرپور یہ غذامعدے میں جمے ہوئے غیرضروری کھانے کو نکال کے ہمارے پیٹ صاف کردیتی ہے۔

٭لہسن: لہسن کے استعمال سے ناصرف ہماری جلد اور بال خوبصورت ہوتے ہیں بلکہ اس میں موجود سلفر معدے کے بچے ہوئے زہریلے کھانے کو بھی ختم کرتا ہے۔اگر دن میں آپ لہسن کے تین ٹکڑے کھا لیں تو یہ آپ کو صحت مند رکھے گا۔

٭لیموں: لیموں میں موجود سٹرک ایسڈ کھانے کو ہضم کرنے میں انتہائی اہم کردار ادا کرتا ہے۔ کبھی بھی اگر آپ کوئی کھانا کھانے لگیں تو اس میں لیموں ضرور ڈال لیں اگر یہ ممکن نہ ہو تو پھر پانی میں ایک لیموں نچوڑ کر پی لیں، اس سے آپ کا معدہ ٹھیک رہے گا اور یہ کھانے کو ہضم کرنے کے علاوہ جسم میں زہریلے مادے بھی کم کر دے گا۔

٭دھنیا: بعض اوقات ہم ایسے کھانے کھا لیتے ہیں جو معدے پر انتہائی بھاری ہوتے ہیں اور ہمیں کھانے کو ہضم کرنے میں بہت پاپڑ بیلنے پڑتے ہیں۔ اگر کھانے میں دھنیے کااستعمال کریں تو یہ معدہ کو ہلکا پھلکا رکھے گااور کھانے کو ہضم کرنے میں اہم کردار ادا کرے گا۔اب اس بات کو یقینی بنائیں کہ اپنے کھانوں میں دھنیا کھائیں،آپ اسے ہانڈی میں بھی ڈال سکتے ہیں اور سلاد کے ساتھ بھی کھا سکتے ہیں۔

٭بروکلی: اگر آپ معدے کی تیزابیت کا شکار ہیں تو بروکلی کو اپنی سلاد کا حصہ بنا لیں۔گوبھی کی طرح یہ سبزی معدے کے زہریلے مواد کو ختم کرتی ہے۔

٭لال مولی: سلاد میں اگر آپ لال مولی استعمال نہیں کر رہے تو فوراًسے پہلے لال مولی کو اپنے کھانے کا حصہ بنائیں۔آپ لال مولی کو گاجر کے جوس کے ساتھ بھی ملا کر استعمال کر سکتے ہیں۔

٭کھیرے: کھیرے میں یہ خاصیت ہوتی ہے کہ یہ معدے کی گرمی کو کم کرتا ہے اور ہضم ہونے کے عمل کوتیز کر دیتا ہے۔ کھیرے کو سلاد میں لال مولی کے ساتھ استعمال کرکے آپ اپنے معدے کو کئی طرح کے زہریلے مواد سے پاک کر سکتے ہیں۔