مارننگ شوز کا دور ختم ہو چکا تمام توجہ اداکاری پر دینا چاہتی ہوں نادیہ خان

17 سال بعد بگ بینگ انٹرٹینمنٹ کے ڈرامہ سے سمیع خان اور صبا حمیدکیساتھ اداکاری میں واپس آرہی ہوں، ’’ایکسپریس‘‘ سے گفتگو۔ فوٹو: نادیہ خان

---

ISLAMABAD: مارننگ شوز کی ملکہ نادیہ خان ایک بار پھر اداکاری کے شعبہ میں قدم رکھنے کو تیار ہیں تاہم نادیہ خان بہت جلد بگ بینگ انٹرٹینمنٹ کے ڈرامہ میں اداکاری کرتی نظر آئیں گی۔

ایکسپریس سے خصوصی گفتگو کرتے ہوئے انھوں نے بتایا کہ وہ 17 سال بعد ڈراموں میں واپسی کررہی ہیں، مارننگ شوز کا دور پاکستان میں ختم ہوچکا ہے، اداکاری میرا پہلا پیار تھا اور میں اب اس پر تمام تر توجہ دینا چاہتی ہوں۔

نادیہ نے اپنے برجستہ انداز میں ہنستے ہوئے کہا کہ ڈرامہ میں واپسی اس لیے بھی کررہی ہوں کیونکہ اس کا سین آن ہے، اسکرپٹ سے لے کر تکنیکی امور سب شاندار ہیں، اتنے عرصے بعد ڈرامہ میں واپس آکر اچھا لگ رہا ہے، ڈراموں کی اسکرپٹ آفرز ہوئی تھیں تاہم مجھے ڈھونڈنا اتنا آسان نہیں، بگ بینگ نے مجھے ڈھونڈ نکالا، لوگ ایسے چانس ڈھونڈتے رہتے ہیں لیکن قسمت سے یہ اسکرپٹ خود میرے پاس آگیا۔

اداکارہ نے کہا کہ میری خواہش ہوتی ہے ہمیشہ بہترین سے بہترین اداکار اور پروجیکٹ میں کام کرنے کی، میرے سامنے ہلکا اداکار آتا ہے تو سین ویسے ہی مرجاتا ہے، اسکرپٹ پڑھنے کے فوراً بعد ساتھی اداکاروں کے بارے میں پوچھا، ابھی اداکار سمیع خان اور صبا حمید کے ساتھ ڈرامہ میں کام کررہی ہوں جب کہ ڈرامہ کی ہدایات بدر محمود دے رہے ہیں۔

نادیہ نے بتایا کہ ڈرامہ کا نام ابھی تک طے نہیں پایا، دس دن کی شوٹنگ کروالی ہے جب کہ ابھی آدھے سے زیادہ شوٹنگ باقی رہتی ہے، ڈرامہ آگست میں نشر ہوگا، یہ ڈرامہ سوشل میڈیا کی تلخ حقیقتوں کے موضوع پر مبنی ہے۔ کون اچھا کون برا، کچھ نہیں معلوم، اور ہمارا جیسا معاشرہ جہاں احتساب ممکن نہیں ہوپاتا، میں اس موضوع کو بہت سنجیدہ لیتی ہوں۔

اداکارہ کا کہنا تھا کہ پاکستان میں تو انھیں کسی فلم کی آفر نہیں آئی تاہم بالی ووڈ نے فلم کی آفر کی تھی جس کا موضوع پاک بھارت پر تھا لیکن میں نے رد کردی کیونکہ میں جو چیزیں مبہم ہوں انھیں کرتے ہوئے کتراتی ہوں۔ انھوں نے کہا کہ مارننگ شوز کا دور 2003 سے2010 تک تھا اب وہ ختم ہوچکا ہے، مجھے نہیں لگتا کہ میں اب دوبارہ مارننگ شوز کرسکوں گی اور نہ ہی گیم شوکیونکہ اس کے لیے جو ہمت اور توانائی چاہیے وہ مجھ میں نہیں ہے، میں کسی سے تربوز خربوزے نہیں کھلواسکتی۔

واضح رہے کہ نادیہ خان کے ڈرامے کی شوٹنگ جاری ہے تاہم نادیہ عید کی چھٹیاں گزارنے اہل خانہ کے پاس دبئی جارہی ہیں اور درامہ کی بقیہ شوٹنگ عید کی چھٹیوں کے بعد کریں گی۔