کملا یا ٹرمپ؟ امریکی صدارتی انتخابات کی لائیو اپ ڈیٹ

عوام ووٹ کے ذریعے آزادی کی جنگ لڑ رہے ہیں، کملا ہیرس

امریکا کے صدارتی انتخاب میں ڈیموکریٹس کی امیدوار کملا ہیرس نے سماجی رابطے کی ویب سائٹ ایکس پر پیغام میں کہاکہ امریکی عوام ووٹ کے ذریعے اپنی آزادی کی جنگ لڑرہے ہیں۔

انہوں نے کہا کہ فیصلہ کرنے کا موقع آپ کے ہاتھ میں ہے، اس موقعے کو ضائع مت کریں۔

کملا ہیرس نے عوام پر زور دیا کہ وہ ووٹ ڈالنے کے کے لیے خود بھی باہرنکلیں اور اپنے دوستوں کو بھی ساتھ لے جائیں۔

کملاہیرس کا پارٹی کے فون بینک کی تعریف

امریکی صدارتی امیدوار کملاہیرس نے ڈیموکریٹک نیشنل کمیٹی کی میزبانی میں فون بینک کا دورہ کیا تاکہ اپنے حامیوں کا ووٹ دینے اور انہیں کال کرنے کے لیے باہر نکلنے پر شکریہ ادا کریں۔

اے پی کی رپورٹ کے مطابق کملا ہیرس نے اس موقع پر اپنے حامیوں سے کہا کہ یہ واقعی طور پر ہم میں سے بہترین کی نمائندگی کرتا ہے اور اس  کے بعد انہیں ایک سیل فون دیا گیا اور وہ فون بینک میں شامل ہو گئیں۔

انہوں نے ووٹرز سے کہا کہ میں ٹھیک ہوں، کیا آپ نے ووٹ دے دیا ہے اور شخص کے جواب پر صدارتی امیدوار نے ان کا شکریہ ادا کیا۔

امریکی انتخابات میں ووٹنگ کا اختتام کس وقت ہو گا

امریکی انتخابات 2024 میں ووٹنگ کا وقت سب سے پہلے ریاست انڈیانا اور کینٹکی میں ختم ہوگا، جہاں مقامی وقت کے مطابق 6 بجے ووٹنگ ختم ہو گی۔

جنوبی کیرولینا، ورمونٹ ،ورجینیا اور جارجیا میں پولنگ کا وقت شام  7 بجے تک ہے۔

جبکہ 20 سےزائد مشرقی اور وسطی ریاستوں میں امریکی شہریوں کو حق رائے دہی استعمال کرنے کے لیے 8 بجے تک کا ٹائم دیا گیا ہے۔ ریاستوں میں پولنگ بند ہونے کے بعد انتخابی نتائج سامنےا ٓنا شروع ہوجائیں گے۔

امریکی خلابازو نے خلا سے ووٹ کاسٹ کرلیا

ناسا کے خلانوردوں بچ ولمور، سنی ولیمز اور ڈون پیٹیٹ نے صدارتی انتخاب کے روز کے آغاز سے قبل انٹرنیشنل اسپیس اسٹیشن (آئی ایس ایس) سے ووٹ کاسٹ کردیا۔

ٹیکساس میں کورٹ آفس کے ہیرس کاؤنٹی کلرک نے بتایا کہ خلابازوں سے انتخاب کے روز کے پیش نظر پہلے ہی اپنا ووٹ کردیا اور یہ خلاباز ہیرس کاؤنٹی کے 12 لاکھ ووٹرز میں شامل ہیں ،جنہوں نے پولنگ کے روز سے قبل اپنا ووٹ کاسٹ کیا تھا۔

انسٹاگرام میں پولنگ کے روز خلابازوں کی تصاویر بھی جاری کردی گئیں، جنہوں نے امریکی پرچم سے مشابہت رکھنے والے موزے پہنے ہوئے ہیں اور ان میں سے دو میں لکھا ہوا تھا کہ امریکی ہونے پر فخر ہے۔

رپورٹ کے مطابق خلاف ووٹنگ ناسا ےک نیئر اسپیس نیٹ ورک کے ذریعے ممکن بنایا گیا، جو آئی ایس ایس سے بیلٹ زمین پر ارسال کر رہا ہے، جس طرح خلائی اسٹیشن سے دیگر دستاویزات بھیجی جاتی ہے اور مشن کنٹرول کیا جاتا ہے۔

اہم کاؤنٹیز میں ووٹنگ کے وقت میں توسیع

امریکا کی مختلف ریاستوں میں الیکشن حکام نے ووٹنگ کا عمل تاخیر شروع ہونے کے باعث مقررہ وقت میں 90 منٹ کی توسیع کردی۔

برطانوی نشریاتی ادارہ (بی بی سی) کی رپورٹ کے مطابق حکام نے بتایا کہ پنسلوانیا کی کاؤنٹی لوزیرنے میں جن پولنگ اسٹیشنز میں ووٹنگ تاخیر سے شروع ہوئی تھی وہاں وقت بڑھا دیا گیا ہے۔

رپورٹ کے مطابق لیفلین بروگ پولنگ اسٹیشن میں ووٹنگ کا عمل اب مقررہ وقت کے بجائے مقامی وقت کے مطابق ساڑھے 9 بجے تک جاری رہے گا۔

اس کے علاوہ جیورجیا کی کاؤنٹی کوب میں دو مقامات میں ووٹنگ کا وقت بڑھا دیا گیا ہے اور مذکورہ اسٹیشنز میں بھی ووٹنگ کا عمل تاخیر سے شروع ہوا تھا۔

خیال رہے کہ امریکا میں مختلف ٹائم زون کی وجہ سے ووٹنگ کا عمل ختم کرنے کا وقت مختلف ہے۔

ٹرمپ اور ڈیموکریٹس کو دھمکی پر دو افراد گرفتار

امریکی میڈیا نے رپورٹ کیا ہے کہ صدارتی امیدوار ڈونلڈ ٹرمپ اور ڈیموکریٹس کو دھمکیاں دینے پر دو افراد گرفتار کرلیا گیا ہے۔

خبرایجنسی کی رپورٹ کے مطابق امریکی ریاست مشی گن میں ایف بی آئی نے صدارتی انتخاب کے حوالے سے دھمکیاں دینے پر دو افراد کو گرفتار کرلیا ہے۔

واشنگٹن ڈی سی میں مسلح شخص گرفتار

امریکی دارالحکومت واشنگٹن ڈی سی میں کیپٹول وزیٹر سینٹر سے پولیس نے آتشیں بندوق، گیسولائن سے بھرے ہوئے کنستر سے مسلح شخص کو گرفتار کرلیا۔

سی این این کی رپورٹ کے مطابق قانون نافذ کرنے والے ادارے کے عہدیدار نے بتایا کہ گرفتار شخص کی شناخت ظاہر نہیں کی گئی ہے تاہم انہیں معمول کی سیکیورٹی تلاشی کے دوران مشکوک نظر آنے پر گرفتار کیا گیا۔

افسر نے بتایا کہ عہدیداروں نے ملزم کی گرفتاری کے بعد ان کے قبضے سے آتشیں بندوق، ایک ٹارچ اور گیسولائن کے دو کنستر برآمد کرلیے۔

انہوں نے کہا کہ گرفتار شہری کو فوری طور پر ہتھکڑی لگائی گئی اور ان کے پاس ایک نوٹ بک بھی تھی، جس کے بارے میں ان کا دعویٰ تھا کہ وہ ایک تقریر کرنا چاہتا تھا۔

یو ایسن سی پی نے بیان میں تصدیق کی ہے کہ ان کے افسران نے ایک شخص کو گرفتار کرلیا ہے، جنہیں کیپٹول وزیٹر سینٹر (سی وی سی) میں تلاشی کے دوران روکا گیا تھا، مذکورہ شخص سے پیٹرول کی جیسی بو آرہی تھی اور کے پاس ٹارچ اور ایک بندوق تھی۔

حکام نے بتایا کہ کیپٹول وزیٹر سینٹر بند کردیا گیا ہے اور پورا دن بند رہے گا۔

فلٹن کاؤنٹی، جارجیا کے پولنگ اسٹیشنز میں بم کی اطلاع

مقامی حکام نے اطلاع دی کہ فلٹن کاؤنٹی، جارجیا کے 2 پولنگ اسٹیشنز میں بم کی دھمکیوں کے باعث کچھ دیر کیلیے ووٹنگ کا عمل روکا گیا تھا۔

اٹلانٹا کے جنوب مغرب میں قائم یونین سٹی گلٹ ایلیمنٹری اور ایٹریس کمیونٹی سینٹر کو بم کی اطلاع کے بعد خالی کرا کے تلاشی لی گئی اس دوران ووٹنگ کا عمل آدھے گھنٹے تک رکا رہا۔

فلٹن کاؤنٹی کی رجسٹریشن اور الیکشن ڈائریکٹر نادین ولیمز نے بعد ازاں میڈیا سے گفتگو میں بتایا کہ بم کی اطلاع محض افرا تفری پھیلانے کی سازش تھی، اب تمام پولنگ اسٹیشنز فعال اور وہاں سیکیورٹی تعینات ہے۔

ولیمز نے کہا کہ فلٹن کاؤنٹی کے حکام تاخیر کی تلافی کے لیے دو متاثرہ مقامات پر ووٹنگ کے اوقات میں توسیع کے لیے عدالتی حکم حاصل کرنے کا ارادہ رکھتے ہیں۔

ساؤتھ فلٹن پولیس ڈیپارٹمنٹ کے ترجمان ٹوری کوپر کے مطابق، فلٹن کاؤنٹی اسکول کو صبح 8:15 کے قریب بم کی دھمکیاں موصول ہونے کے بعد پولنگ میں خلل آیا تھا، اس کے بعد سے سیکیورٹی کو مزید سخت کردیا گیا ہے۔

سیکریٹری مشی گن نے ووٹرز کو غیرملکی سازش سے خبردار کردیا

امریکی ریاست مشی گن کی سکریٹری آف اسٹیٹ نے ووٹرز کو خبردار کیا کہ وہ 'غیر ملکی سازشوں' سے محتاط رہیں اور ووٹنگ کیلیے باہر نکلیں۔

مشی گن سکریٹری آف اسٹیٹ جوسلین بینسن نے منگل کے روز ووٹروں سے غلط معلومات کے خلاف چوکس رہنے کی اپیل کی اور خبردار کیا کہ 'غیر ملکی ایجنٹس' محفوظ اور انتخابی عمل میں خلل ڈالنے کی کوشش کر سکتے ہیں۔

بینسن نے ایک نیوز کانفرنس میں کہا کہ ہمارے مخالف ملک آج کے دن ووٹرز کو کنفیوز کرنے کے لیے غلط معلومات سمیت ہر قسم کے ہتھکنڈے استعمال کرسکتے ہیں جس کا مقصد ریاستہائے امریکا میں افرا تفری، خوف اور تقسیم کو پھیلنا اور یہ شفاف انتخابات کی راہ میں رکاوٹ حائل کرنا ہے۔

انہوں نے ووٹرز کو یقین دلایا کہ اب تک کسی بھی قسم کی مداخلت یا ووٹنگ میں رکاوٹ کی اطلاعت موصول نہیں ہوئی جبکہ 100 اراکین پر مشتمل ایک ٹیم ریاست بھر میں بے ضابطگیوں پر نظر کیلیے نگرانی کررہی ہے۔

بینسن نے کہا، 'ہم آن لائن پوسٹ ہونے والی ہر چیز کی نگرانی کر رہے ہیں‘۔

صدارتی الیکشن، ٹرمپ نے اپنا ووٹ کاسٹ کردیا

عدالت نے ایلون مسک کو ٹرمپ کے ووٹرز کو 10 لاکھ ڈالرز دینے کی اجازت دیدی

امریکی عدالت نے اپنے ایک بڑے فیصلے میں ایلون مسک کو ٹرمپ کے حامیوں کو 10 لاکھ ڈالر دینے کی مہم جاری رکھنے کی اجازت دیدی۔

عالمی خبر رساں ادارے کے مطابق ایلون مسک نے امریکی آئین میں پہلی اور دوسری ترمیم کی حمایت میں آن لائن پٹیشن پر دستخط کرنے والوں میں لاکھوں ڈالر تقسیم کرنے کا اعلان کیا تھا۔

جس پر ٹرمپ کی جماعت ریپبلکن کے 11 سابق عہدیداروں نے صدارتی انتخابات سے قبل ووٹرز میں رقوم بانٹنے کی قانونی حیثیت پر سوال اٹھائے تھے اور مقدمہ بھی دائر کیا تھا۔

قانونی ماہرین کا بھی کہنا تھا کہ ایسی کوئی بھی پیشکش جس میں ووٹر کو دستخط کرنے کے لیے رقم کی پیشکش کی جائے، امریکی قانون کی خلاف ورزی ہے۔

روس امریکی الیکشن میں ووٹرز کو تشدد پر اکسا سکتا ہے، امریکی خفیہ اداروں کا انتباہ

فیڈرل بیورو آف انویسٹی گیشن (ایف بی آئی) اور سائبر سیکیورٹی اینڈ انفراسٹرکچر سیکیورٹی ایجنسی (سی آئی ایس اے) نے انتباہ جاری کیا ہے۔

انتباہ میں کہا گیا ہے کہ الیکشن پر روس الیکشن کے عمل میں شہریوں کے اعتماد کو مجروح کرکے ان کے درمیان تقسیم پیدا کرنے کی کوششیں کرے گا۔

مشترکہ اعلامیے میں کہا گیا ہے صدارتی الیکشن کے نتائج میں اہم کردار ادا کرنے والی فیصلہ کن ریاستوں میں عوام کو مشتعل کرنے کے لیے جعلی ویڈیوز اور آن لائن مضامین کا سہارا لیا جائے گا۔

بیان میں کہا گیا ہے کہ ایسے مواد سے ووٹرز کو ایک دوسرے کے خلاف تشدد پر اکسایا جا سکتا ہے۔ سائبر حملوں کا بھی خدشہ ہے۔

امریکا میں کہیں ووٹنگ کا آغاز تو کہیں ووٹنگ ختم؛ معاملہ کیا ہے

امریکا میں 6 ٹائم زونز ہیں جس کی وجہ سے کسی ریاست کے شہری طلوع سحر سے لطف اندوز ہو رہے ہوتے ہیں تو کہیں رات سیاہی دن کو ڈھانپ رہی ہوتی ہے۔

امریکا کے ایسٹرن، سینٹرل، ماؤنٹین اور پیسیفک اسٹینڈرڈ ٹائم زونز ہونے کی وجہ سے کسی ریاست میں ووٹنگ شروع ہوچکی ہوگی تو کہیں ووٹنگ کے آغاز میں کئی گھنٹے باقی ہوں گے۔

اسی طرح کسی ریاست میں ووٹنگ کا عمل ختم ہوچکا ہوگا لیکن بہت سی ریاستوں میں ووٹرز نے ابھی اپنا رائے دہی استعمال کرنا شروع ہی کیا ہوگا۔

ٹائم زونز کے اس فرق کی وجہ سے امریکا میں ہونے والے صدارتی الیکشن کے نتائج مرتب ہونے اور ان کے اعلان کے اوقات کار بھی مختلف ہوں گے۔

امریکا؛ صدارتی الیکشن کیساتھ کانگریس ارکان، گورنرز اور میئرز کیلیے بھی انتخابات ہو رہے ہیں

امریکی کانگریس کے ایوانِ زیریں (ایوان نمائندگان) کی تمام 435 اور ایوان بالا (سینیٹ) کی 100 میں سے 34 نشستوں پر بھی الیکشن آج ہو رہا ہے۔

خال رہے کہ ایوانِ نمائندگان کے انتخابات ہر دو سال بعد ہوتے ہیں اور ارکان بھی 2 سال کے لیے ہی منتخب ہوتے ہیں۔

ایوان نمائندگان اور ایوان بالا کے علاوہ ملک کی 11 ریاستوں میں گورنرز کے انتخاب کے لیے بھی آج ہی ووٹنگ ہو رہی ہے۔

علاوہ ازیں ہزاروں کی تعداد میں ریاستوں کے قانون سازوں، شہروں کے میئرز اور بلدیاتی نمائندوں کے انتخابات بھی ہو رہے ہیں۔

کئی ریاستوں میں ریفرنڈم کا انعقاد بھی آج ہو رہا ہے جن میں ووٹروں سے اسقاط حمل، ٹیکس پالیسی اور گانجے کے استعمال جیسے مسائل کے بارے میں رائے لی جائے گی۔

امریکی صدارتی امیدوار کملا ہیرس کی جیت کےلیے بھارتی گاؤں میں پوجا

امریکی صدارتی امیدوار کملا ہیرس کی انتخابات میں کامیابی کےلیے بھارتی ریاست تامل ناڈو کے گاؤں تھولاسندرا پورم میں پوجا کی جارہی ہے۔

آج امریکا کی صدارت کے لیے ڈونلڈ ٹرمپ اور کملا ہیرس مدمقابل ہیں۔ جلد ہی اس مقابلے کے نتائج سامنے آجائیں گے اور دونوں امیدواروں میں سے کوئی ایک امریکی صدارت کے منصب پر فائز ہوجائے گا۔ لیکن بھارتی ریاست تامل ناڈو کے گاؤں کے رہائشی کملا ہیرس کی کامیابی کےلیے مندروں میں پوجا کررہے ہیں۔

بھارت کا یہ گاؤں کملا ہیرس کے نانا پی وی گوپالن کا جائے پیدائش ہے۔ اس لحاظ سے اسے کملا ہیرس کے آبائی گاؤں کی حیثیت حاصل ہے۔ کملا کے نانا نے بعد میں چنائے میں رہائش اختیار کرلی تھی جہاں کملا ہیرس کی والدہ شیاما گوپالن پیدا ہوئیں۔ اور بعد ازاں ان کی والدہ نے 1958 میں 19 سال کی عمر میں امریکا میں مستقل سکونت اختیار کرلی تھی۔

امریکی صدارتی الیکشن میں کون سے شہری ووٹ کاسٹ نہیں کرسکتے

امریکی صدارتی الیکشن میں بعض ریاستوں میں جو ووٹرز اپنا ووٹ کاسٹ نہیں کرسکتے ان میں سزا یافتہ مجرموں اور ذہنی طور پر مفلوج افراد شامل ہیں۔

اسی طرح پورٹو ریکو، یو ایس ورجن آئی لینڈز، گوام، شمالی مریاناس جزیرے اور امریکی سموا کے علاقوں میں رہنے والے بھی ووٹ نہیں ڈال سکتے، البتہ ملک سے دور رہنے والے امریکیوں کو "ایبسنٹ بیلٹ" کی سہولت فراہم کی جاتی ہے۔

ہیرس یا ٹرمپ صدارتی الیکشن کی درست ترین پیش گوئی کرنے والے نجومی نے بتا دیا

امریکی میڈیا کے مطابق ایلن لچٹ مین نے مستقبل کے صدر کی پیش گوئی کے لیے اپنے تاریخی انڈیکس ماڈل کو استعمال کیا ہے جسے وہ "وائٹ ہاؤس کی چابیاں" کہتے ہیں۔ جس کے ذریعے وہ پچھلے 10 میں 9 انتخابات کی درست پیش گوئیاں کرچکے ہیں۔

امریکا مستند ترین ماہر نجومی سمجھے جانے والے ایلن لچٹ مین نے 2024 کی صدارتی دوڑ میں کامایب ہونے والے امیدوار کے بارے اپنی حتمی پیش گوئی کردی۔

نیویارک ٹائمز کے مطابق 77 سالہ ایلن لچٹ مین نے کہا کہ جولائی میں جو بائیڈن کے دستبردار ہونے کے بعد ڈیموکریٹک پارٹی کے نامزد امیدوار بننے والی کملا ہیرس اپنے سخت ترین حریف ڈونلڈ ٹرمپ کو شکست دیدیں گی۔