وزیر اعظم چاہیں تو اسمبلی توڑ سکتے ہیں یوسف رضا گیلانی

سابق وزیر اعظم یوسف رضا گیلانی کا کہنا ہے کہ وزیر اعظم خود چاہیں تو اسمبلی توڑ سکتے ہیں لیکن حکومت کو 5 سال کی مدت پوری کرنی چاہئے۔


ملتان میں میڈیا سے بات کرتے ہوئے سابق وزیر اعظم سید یوسف رضا گیلانی کا کہنا تھا کہ ملک کو بحرانوں سے نکالنے کا تجربہ صرف پیپلز پارٹی کے پاس ہے اور ہم نے جمہوری طریقے کو اپناتے ہوئے ہمیشہ آئین اور اداروں کا احترام کیا ہے یہی وجہ ہے کہ حکومت کے اچھے کاموں کو اچھا اور غلط کو غلط کہا ہے جب کہ پیپلزپارٹی نے موجودہ حکومت کے ساتھ ذمہ دارانہ اپوزیشن کا کردار ادا کیا ہے۔

یوسف رضا گیلانی کا کہنا تھا کہ آئین کے تحت وزیر اعظم خود چاہیں تو اسمبلی توڑ سکتے ہیں لیکن وزیراعظم کو اسمبلی تحلیل نہیں کرنی چاہیے بلکہ حکومت کو 5 سال کی مدت پوری کرنی چاہئے۔ انہوں نے کہا کہ بلاول بھٹو 15 دسمبر کو ملتان میں جلسہ کریں گے جب کہ اگلے الیکشن میں چاروں صوبوں اور وفاق میں پیپلز پارٹی کی حکومت ہوگی۔