عباس ٹاؤن دھماکے میں تباہ عمارات جلدتعمیرکی جائیںگورنرسندھ

گورنرسندھ ڈاکٹر عشرت العباد خان نے عباس ٹاؤن بم دھماکے میں تباہ ہونے والی عمارتوں کی جلد تعمیر کے احکام دیتے ہوئے اس بات کی یقین دہانی کرائی ہے کہ تعمیرات پر ہونے والی لاگت حکومت سندھ فراہم کرے گی اور اس ضمن میں آئندہ چندروز میں کمشنر کے خصوصی اکاؤنٹ میں فنڈز مہیا کردیے جائیں گے۔

انھوں نے کہا کہ وعدے کے مطابق سانحے میں زخمی ہونے والے افراد کو حکومت کی جانب سے امداد دے دی گئی ہے جبکہ جاں بحق ہونے والے افراد کے لواحقین کو بھی قانونی اقدامات کو پورا کرتے ہوئے آئندہ چندروز میں چیک فراہم کردیے جائیں گے۔ حکومت سندھ نے یہ تمام چیک کمشنر کراچی کو فراہم کردیے ہیں۔




گورنرسندھ نے کہا کہ فلیٹس کی تعمیر کو کم از کم مدت میں یقینی بنانے کیلیے ضروری ہے کہ مستند اور اچھے تعمیراتی اداروں کو رابطے میں لیا جائے تاکہ تعمیرات میں بیجا وقت ضائع نہ ہو۔ انھوں نے کہا کہ فلیٹس کے انہدام کا کام پیر سے شروع ہوجائے گا جو کم سے کم وقت میں مکمل کرلیا جائے گا۔ تمام کارروائی کو سپروائز کرنے کیلیے کمشنر کے زیرنگرانی 8رکنی کمیٹی تشکیل دیدی گئی ہے جس میں متاثرین اور رفاہی اداروں کے افراد شامل ہیں۔ انھوں نے کہا کہ فلیٹس کی تعمیر کا تخمینہ 15 کروڑ روپے لگایا گیا ہے اور امید ہے کہ یہ تعمیر 6سے 8ماہ کے دوران مکمل کرلی جائے۔