نیوکراچی فلیٹ میں آگ لگنے سے 2 خواتین جھلس کر زخمی

سرسید ٹاؤن میں یوٹیلیٹی اسٹور، بینک اور فیڈرل بی صنعتی ایریا میں دھاگا فیکٹری میں آتشزدگی۔ فوٹو: فائل

---

نیو کراچی میں فلیٹ میں آگ لگنے سے 2 خواتین جھلس کر زخمی ہوگئیں جبکہ سرسید ٹاؤن میں یوٹیلیٹی اسٹور اورشہید ملت فلائی اوور کے قریب نجی بینک کے میٹروں میں آگ بھڑک اٹھی ۔

بلال کالونی کے علاقے نیوکراچی سیکٹر5-M نازیہ اسکوائر کی چوتھی منزل پر واقع فلیٹ میں اچانک آگ بھڑک اٹھی جس کی اطلاع پر فائر بریگیڈ کا عملہ 2 گاڑیوں کے ہمراہ موقع پر پہنچ گیا اور 45 منٹ کی جدوجہد کے بعد آگ پر قابو پاتے ہوئے دیگرفلیٹوں کوجلنے سے بچالیا،فائر بریگیڈ کے مطابق آتشزدگی کے نتیجے میں فلیٹ کی رہائشی خاتون 60 سالہ نجمہ اور 20 سالہ عائشہ جھلس کر زخمی ہوگئیں جنھیں فوری طبی امداد کیلیے عباسی شہید اسپتال لیجایا گیا، فائر بریگیڈ کا کہنا ہے کہ آگ شارٹ سرکٹ کے باعث لگی تھی۔



جبکہ آتشزدگی سے گھریلو فرنیچر اور دیگر سامان جل کر خاکستر ہوگیا ، سرسید ٹاؤن کے علاقے سیکٹرالیون سی ون محبوب ہائٹس میں قائم یوٹیلیٹی اسٹور میں جمعے کی صبح اچانک آگ بھڑک اٹھی ، اطلاع ملنے پر فائر بریگیڈ کا عملہ موقع پر پہنچ گیا اور ایک گھنٹے کی جدوجہد کے بعد آگ پر قابو پاتے ہوئے دیگر دکانوں اور پہلی منزل کے فلیٹوں کو جلنے سے بچالیا،آتشزدگی کے باعث یوٹیلٹی اسٹور میں رکھا ہوا لاکھوں روپے مالیت تمام سامان جل کر خاکستر ہوگیا ، ٹیپوسلطان کے علاقے شہید ملت فلائی اوور کے نیچے نجی بینک کے باہر لگے ہوئے بجلی کے میٹروں میں شارٹ سرکٹ کے باعث اچانک آگ بھڑک اٹھی۔

جس پر بینک کے گارڈز نے فائر بریگیڈ کے پہنچنے سے قبل قابو پالیا تاہم آتشزدگی کے باعث متعدد میٹرجل گئے۔ فیڈرل بی صنعتی ایریا بلاک نمبر 22 میں واقع دھاگا فیکٹری میں جمعے کی رات اچانک آگ بھڑک اٹھی ، آتشزدگی کی اطلاع ملتے ہی فائر بریگیڈ کا عملہ 6 گاڑیوں اور ایک باوزر کے ہمراہ موقع پر پہنچ گیا اور ڈھائی گھنٹے کی سخت جدوجہد کے بعد آگ پر قابو پاتے ہوئے فیکٹری کو مکمل طور پر جلنے سے بچالیا ۔