NEW DEHLI:
افغانستان میں امریکی وزیر دفاع کی موجودگی میں 2 خودکش دھماکوں میں 8 بچوں سمیت 17افراد ہلاک اور متعدد زخمی ہوگئے۔
افغان دارالحکومت کابل میں وزارت دفاع کے دفتر کے باہر ہونے والا خود کش حملہ امریکا کے نئے وزیر دفاع چک ہیگل کے افغانستان پہنچنے کے کچھ ہی گھنٹے بعد کیا گیا۔ دھماکے میں 9 افراد ہلاک جبکہ متعدد زخمی ہوگئے ہیں جنہیں اسپتال میں منتقل کردیا گیا جہاں زخمیوں کو طبی امداد فراہم کی جارہی ہے۔ افغان حکام کے مطابق ہلاک اور زخمی ہونے والے افراد میں مقامی سیکیورٹی کے کئی اہلکار بھی شامل ہیں۔ واقعے کے بعد امریکی سفارت خانے نے اپنے اہلکاروں اور شہریوں کو غیر ضروری سفر سے گریز کرنے کی ہدایت کی ہے۔
دوسرا دھماکا صوبہ خوست میں ہوا جب حملہ آور نے نیٹو اور افغان فورسز کو نشانہ بنایا، حملے میں 8 بچے ہلاک جب کہ 2 زخمی ہوئے۔
واضح رہے کہ نئے امریکی وزیر دفاع چک ہیگل غیراعلانیہ دورے پر افغانستان میں موجود ہیں ، کابل ایئر پورٹ پر میڈیا سے بات کرتے ہوئے انہوں نےکہا کہ امریکا افغانستان میں اب بھی حالت جنگ میں ہے اور امریکی فوجی انخلاء کے چیلنج سے نمٹنے کے لئے تیار ہیں، امریکا چاہتا ہے کہ افغانستان میں سیکیورٹی کی منتقلی درست طریقے سے ہو،افغان حکام سے مل کر سیکیورٹی کی منتقلی یقینی بنائیں گے۔