مداح نے ورون دھون کا ٹریفک چالان کرا ڈالا

ممبئی پولیس کی جانب سے ورون کو ای چالان دینے پر اداکار نے بھی معافی مانگ لی۔ . فوٹو : فائل

---

KARACHI: بالی ووڈ کے نوجوان اداکار ورون دھون کو مداح کے ساتھ سڑک پرسیلفی لینے کے چکر میں چالان بھرنا پڑگیا۔

بالی ووڈ کو یکے بعد دیگر بلاک بسٹر فلمیں دینے والے نوجوان اداکار ورون دھون حال ہی میں فلم 'جڑواں ٹو' کی کامیابی کے بعد شہرت کی بلندیوں پر ہیں یہی وجہ ہے کہ ان کے مداحوں کی تعداد میں دن بدن اضافہ ہوتا جارہا ہے اور وہ مداحوں میں فوری گھل مل جانے کی وجہ سے بھی خاصے مقبول ہیں لیکن ٹریفک کے دوران مداح کی خوشی کے خاطر سیلفی لینا اداکار کو مہنگا پڑ گیا۔

بھارتی میڈیا رپورٹس کے مطابق بالی ووڈ اداکار ممبئی کی ٹریفک میں پھنسے تو اس دوران ان کی کار کے ساتھ ایک رکشہ کھڑا ہوا جس میں موجود خاتون مداح نے ورون کے ساتھ سیلفی بنانے کی خواہش کا اظہار کیا تو اداکار بھی پیچھے نہ رہے اور گاڑی کا شیشہ نیچے کرنے کے بعد سر باہر نکال کر سیلفی لے لی جو ممبئی پولیس کو بالکل پسند نہ آئی اور انہوں نے ورون کو چالان تھمادیا۔

https://twitter.com/MumbaiPolice/status/933570850292461568

ممبئی پولیس کی جانب سے سوشل میڈیا پر سیلفی کی تصویریں پوسٹ کی گئی جس میں کہا گیا کہ اس طرح کے ایڈوینچر ممبئی کی سڑکوں پر نہیں بلکہ سلور اسکرین پر اچھے لگتے ہیں جب کہ آپ نے اس حرکت سے اپنی اور مداح سمیت کئی افراد کی جان خطرے میں ڈالی، ہم آپ جیسے ذمہ دار شہری اور نوجوانوں کے رول ماڈل سے ایسی اُمید ہرگز نہیں رکھتے، فی الحال اس حرکت پر ای چالان آپ کے گھر بھجوا رہے ہیں لیکن اگلی بار اس سے سخت کارروائی کی جائے گی۔

My apologies 🙏 Our cars weren’t moving since we were at a traffic signal and I didn’t want to hurt the sentiment of a fan but next time I’ll keep safety in mind and won’t encourage this. https://t.co/MEJk56EksG

— VarunDhawan (@Varun_dvn) November 23, 2017

ممبئی پولیس کی ٹوئٹ کے بعد اداکار نے بھی سوشل میڈیا پر معافی مانگتے ہوئے لکھا کہ میری گاڑی ٹریفک میں پھنس گئی تھی اور میں ایک مداح کا دل نہیں توڑنا چاہتا تھا لیکن اگلی بار میں اس بات کا خیال رکھوں گا اور ایسے اقدام کی حوصلہ افزائی نہیں کروں گا۔