چیئرمین اینٹی کرپشن کو2سال کا کنٹریکٹ دینے کی منظوری

عدالت کی جانب سے کنٹریکٹ پر موجود پولیس افسران کی برطرفی کے باوجود وزیراعلیٰ کا اقدام

Adil Jawad March 12, 2013

کنٹریکٹ پر توسیع پانیوالے جاوید بخاری 28 مارچ کو 60 سال کی عمر میں ریٹائر ہوجائینگے فوٹو فائل

سپریم کورٹ کی جانب سے کنٹریکٹ پر کام کرنے والے پولیس افسران کی برطرفی کے باوجود وزیراعلیٰ سندھ نے چیئرمین انکوائریز اینڈ اینٹی کرپشن جاوید علی بخاری کو ریٹائرمنٹ کے بعد 2 سال کا کنٹرکیٹ دینے کی منظوری دے دی ہے۔

بلکہ انھیں موجودہ عہدے پر ہی برقرار رکھنے کے احکام بھی جاری کیے ہیں۔ پولیس سروسز آف پاکستان کے گریڈ 21 کے افسر جاوید علی بخاری مارچ کی 28 تاریخ کو 60 سال عمر ہوجانے کے بعد ریٹائرڈ ہوجائیں گے، جاوید علی بخاری گذشتہ ایک سال سے زائد سے چیئرمین اینٹی کرپشن کے عہدے پر تعینات ہیں۔

ذرائع نے بتایا کہ اس سلسلے میں مروجہ قواعد و ضوابط کے مطابق پہلے ریٹائرڈ ہونے والے افسران کو کنٹریکٹ پر رکھنے کی منظوری دی جاتی ہے اور اس کے بعد کنٹریکٹ حاصل کرنے والے افسر کی کسی بھی عہدے پر تعیناتی کے احکام جاری کیے جاتے ہیں، تاہم اس معاملے میں وزیراعلی سندھ نے مروجہ طریقہ کار کو نظر انداز کرتے ہوئے ایک ہی حکمنامے میں کنٹریکٹ اور تعیناتی کے احکام جاری کردیے ہیں۔

اس کی بنیادی وجہ یہ ہے کہ موجودہ حکومت کی میعاد 16 مارچ کو ختم ہوجائے گی اور جاوید علی بخاری تقریبا 12 دن بعد ریٹائرڈ ہوں گے اور حکومت یہ چاہتی ہے کہ چیئرمین اینٹی کرپشن کے انتہائی اہم عہدے پر نگراں دور میں بھی کوئی ایسا افسر تعینات نہ ہو جو الیکشن کے دوران ان کیلیے مشکلات پیدا کرے۔