کراچی اسکواش نوشیروان نے کاشف کو اپ سیٹ شکست دیدی

KARACHI:
پہلی ڈی ایچ اے کراچی انٹرنیشنل اسکواش چیمپئن شپ منگل سے آصف نوازکورٹس کراچی میں شروع ہو گئی۔

افتتاح بریگیڈیئر محمد عبداللہ نے کیا، فائنل رائونڈ کے مینز ایونٹ میں نوشیروان خان نے نیوزی لینڈ کی نمائندگی کرنے والے واحد غیرملکی پاکستان نژاد کاشف شجاح کو95منٹ کے سخت مقابلے کے بعد 11-5،9-11،11-7اور11-9 سے شکست دیکر ٹورنامنٹ کا پہلا اپ سیٹ کیا،ٹاپ سیڈ عامر اطلس خان نے حریف کرامت اللہ خان کو 25منٹ میں 3-0 سے زیر کرلیا،دیگر مقابلوں میں سید علی شاہ بخاری نے اپنے بھائی حمزہ شاہ بخاری، خواجہ عادل مقبول نے شعیب حسن،دانش اطلس خان نے محمد ثاقب یوسف،فرحان زمان نے طیب اسلم، عاقب حنیف نے کاشف خان اور ناصر اقبال نے وقاص محبوب کو ہرا دیا۔




ویمنز ایونٹ میں کوالیفائی کر کے فائنل رائونڈ میں پہنچنے والی مدینہ ظفر نے اپنے سے کہیں تجربہ کار تھرڈ سیڈانم عزیز کو شکست دیکر اپ سیٹ کیا، مدینہ نے محض 18 منٹ ہی میں اپنی حریف کے خلاف 11-3،11-6 اور 11-8 سے کامیابی حاصل کی،دیگر مقابلوں میں ٹاپ سیڈ زوہا خالد نے فائزہ ظفر، رفعت خان نے صائمہ شوکت، ثمر انجم نے حبیبہ خان،روشنا محبوب نے روما یوسف، عائشہ ظفر نے تحریمہ اسلام،آمنہ لطیف میرل شیخ اور زوہیبہ خان نے مونسہ نثار کو ہرا دیا۔