کینیڈا میں عدنان سمیع کو موسیقی میں گراں قدرخدمات انجام دینے پرایوارڈ سے نوازا جائے گا

اللہ تعالیٰ کا بے حد شکر گزار ہوں کہ ان کا میوزک لوگوں کے چہروں پر خوشی بکھیرنے کی وجہ بنتا ہے، عدنان سمیع فوٹو: پبلسٹی

---

ISLAMABAD: بھارت میں مقیم پاکستانی گلوکار اور موسیقار عدنان سمیع کو میوزک، آرٹس اور کلچر میں گراں قدر خدمات انجام دینے پر کینیڈا کے صوبے اونٹاریو کی قانون سازاسمبلی کی جانب سے ایوارڈ سے نوازا جائے گا۔

کینیڈا کے صوبے اونٹا ریو کی قانون ساز اسمبلی کے اسپیکر عدنان سمیع کو موسیقی میں گراں قدرخدمات انجام دینے پر ایوارڈ سے نوازیں گے بعد ازاں انہیں قانون ساز اسمبلی کا دورہ بھی کرایا جائے گا۔

عدنان سمیع کا اس حوالے سے کہنا تھا کہ وہ اس اعزاز کے لئے منتخب کئے جانے پر کینیڈین حکام کے شکر گزار ہیں۔ انہوں نے کہا کہ وہ اللہ تعالیٰ کے بھی بے حد شکر گزار ہیں کہ ان کا میوزک لوگوں کے چہروں پر خوشی بکھیرنے کی وجہ بنتا ہے اور ان کی زندگیوں پر مثبت انداز میں اثرانداز ہوتا ہے۔

عدنان سمیع کوکینیڈا میں 21 مارچ کو ایوارڈ سے نوازا جائے گا اور 22مارچ کو وہ ٹورنٹو کے رائے تھامسن ہال میں پرفارم بھی کریں گے، قانون سازاسمبلی کے رکن شفیق قادری کی جانب سے عدنان سمیع کے اعزاز میں عشائیہ بھی دیا جائے گا۔