بے قابو ڈمپر نے لانڈھی میں موٹرسائیکل روندکر 2 بچیاں مارڈالیں

بچیوں کا باپ شدید زخمی،مشتعل افراد کی ڈمپر جلانے کی کوشش،ڈرائیور گرفتار. فوٹو: ایکسپریس ، فائل

---

MUMBAI: لانڈھی فیوچر موڑ پر تیز رفتار ڈمپر کی ٹکر سے موٹر سائیکل پر اپنے باپ کے ہمراہ جانے والی2 کمسن بچیاں جاں بحق ہوگئیں ۔

ماڑی پور میں ٹریفک حادثے میں نامعلوم شخص ہلاک ہوگیا، تفصیلات کے مطابق لانڈھی فیوچر موڑ پر تیز رفتار ڈمپر ٹی اے بی230 کے ڈرائیور نے موٹر سائیکل کو ٹکر مار دی،موٹر سائیکل پر 40 سالہ ملک اپنی دو بیٹیوں 10سالہ زہرا اور 12سالہ عینی بی بی کے ہمراہ جارہا تھا کہ ڈمپر کی ٹکر سے دونوں بچیاں موقع پر ہی جاں بحق ہوگئیں۔



جبکہ ملک شدید زخمی ہوگیا،حادثہ اس قدر خوفناک تھا کہ اسے دیکھ کر موقع پر موجود افراد مشتعل ہوگئے اور انھوں نے ڈرائیور کو پکڑ کر شدید تشدد کا نشانہ بنایا اور اسی دوران مشتعل افراد نے ڈمپر نذر آتش کرنے کی کوشش کی تاہم پولیس نے ڈمپر جلنے سے بچالیا اور ڈرائیور کو گرفتار کرلیا، حادثے میں جاں بحق ہونیوالے بچیوں کے والد فیوچر کالونی کے رہائشی ہیں،علاوہ ازیں ماڑی پور میں ٹرک اڈا کے قریب تیز رفتار گاڑی کی ٹکر سے ایک شخص ہلاک ہوگیا ،متوفی کی فوری طور پر شناخت نہیں ہوسکی ۔