ٹریفک حادثات اور دیگر واقعات میں خاتون سمیت3افراد ہلاک

لیاقت آباد میں مشتعل افراد نے حادثے کے ذمے دار ڈمپر کو آگ لگادی، کورنگی میں پک اپ الٹنے سے6خواتین زخمی ہوگئیں۔ فوٹو: فائل

---

شہر کے مختلف علاقوں میں ٹریفک حادثات و دیگر واقعات میں خاتون سمیت3افراد ہلاک ہوگئے، لیاقت آباد میں مشتعل افراد نے ڈمپر کو آگ لگادی جبکہ ڈرائیور کو تشدد کے بعد پولیس کے حوالے کردیا گیا، ڈرگ روڈ پر ٹرین کی زد میں آکر ہلاک ہونے والے نوجوان کی شناخت نہیں ہوسکی، کورنگی میں سوزوکی پک اپ الٹنے سے 6خواتین زخمی ہوگئیں جنھوں طبی امداد کیلیے اسپتال منتقل کردیا گیا۔

تفصیلات کے مطابق سپر مارکیٹ تھانے کی حدود لیاقت آباد ہمسفر شادی ہال کے قریب سڑک عبور کرنے والی40سالہ حنا زوجہ فیصل کو تیز رفتار ڈمپر نمبرJT-5527نے کچل کر ہلاک کردیا موقع پر موجود افراد نے مشتعل ہوکر حادثے کے ذمے دار ڈمپر کو نذر آتش کردیا اور ڈرائیور کو تشدد کے بعد پولیس کے حوالے کردیا پولیس کے مطابق متوفیہ حنا ملیر لیاقت مارکیٹ کی رہائشی تھی اور اپنے رشتے داروں کے ساتھ لیاقت آباد فرنیچر مارکیٹ فرنیچر خریدنے آئی تھی۔

پولیس نے لاش ضابطے کی کارروائی کے بعد ورثا کے حوالے کردی، کورنگی صنعتی ایریا تھانے کی حدود کورنگی کراسنگ اﷲ والا ٹاؤن میں گھر کے اندر بجلی کا کام کرتے ہوئے کرنٹ لگنے سے25سالہ یاور ولد نعیم ہلاک ہوگیا۔

ڈرگ روڈ ریلوے چوکی کی حدود میں ڈرگ روڈ ریلوے پھاٹک پر کوئٹہ سے کراچی آنے والی بولان میل کی زد میں آکر18سالہ نوجوان ہلاک ہوگیا جس کی لاش جناح اسپتال لائی گئی پولیس کے مطابق متوفی کی شناخت نہیں ہوسکی،کورنگی مرتضی چورنگی پر سوزوکی پک اپ الٹ جانے سے6خواتین زخمی ہوگئیں جنھیں قریبی اسپتال لایا گیا ۔