روپے کی بے قدری روئی کا بھاؤ 500 روپے بڑھ کر 7500 پر پہنچ گیا

اسپاٹ ریٹ 400 روپے اضافے سے7000،پھٹی 2800 تا 3500 روپے ہوگئی،عالمی مارکیٹ میں بھی دام بلند

Business Reporter December 18, 2017

ٹیکسٹائل سیکٹر بحرانی کیفیت میں آگیا،ڈالرریٹ مزید چڑھنے سے روئی کی درآمد مہنگی ہوجائے گی،نسیم عثمان۔ فوٹو: اے پی پی/فائل

مقامی کاٹن مارکیٹ میں گزشتہ ہفتے دوران روپے کی نسبت ڈالر کی قدر میں ہونے والے5 فیصد اضافے سے امریکی ڈالر پاکستان کی تاریخ کی بلند ترین سطح 112 روپے پر پہنچ گیا جس کے باعث ٹیکسٹائل و اسپننگ ملز نے اعلی کوالٹی کی روئی کی خریداری بڑھادی جس کے باعث روئی کا بھاؤ فی من 500 روپے کے غیر معمولی اضافے کے ساتھ فی من 7500 روپے کی بلند ترین سطح پر پہنچ گیا جس کی وجہ سے مارکیٹ میں بحرانی کیفیت پیدا ہوگئی۔

کراچی کاٹن بروکرز فورم کے چیئرمین نسیم عثمان نے بتایا کہ اس سے پہلے 2010-11 کے سیزن میں روئی کا بھاؤ فی من 1400 روپے کی پاکستان کی تاریخ کی بلند ترین سطح پر پہنچ گیا تھا۔ اس وقت خام تیل کی قیمت میں ہوشربا اضافہ ہوگیا تھا، سونا بھی بے تحاشہ بڑھ گیا تھا۔ نیویارک کاٹن میں روئی کا وعدے کا بھاؤ امریکا ہی نہیں دنیا کی تاریخ کی بلند ترین سطح فی پاؤنڈ 2.29 ڈالر پر پہنچ گیا تھا، دنیا میں کپاس کا بحران پیدا ہوگیا تھا۔

نسیم عثمان کے مطابق اب 6 سال کے بعد روئی کا بھاؤ فی من 7500 روپے کی ریکارڈ سطح کو چھو گیا۔ پھٹی، کھل اور تیل کے بھاؤ میں بھی اضافہ ہوگیا۔ کراچی کاٹن ایسوسی ایشن کی اسپاٹ ریٹ کمیٹی نے اسپاٹ ریٹ میں فی من 400 روپے کے اضافے کے ساتھ فی من 7000 روپے کے بھاؤ پر بند کیا۔صوبہ سندھ میں روئی کا بھاؤ فی من 6300 تا 7500 روپے پھٹی کا بھاؤ فی 40 کلو 2800 تا 3500 روپے جبکہ صوبہ پنجاب میں روئی کا بھاؤ فی من 6400 تا 7500 روپے پھٹی کا بھاؤ فی 40 کلو 2800 تا 3500 روپے رہا۔ بین الاقوامی کاٹن مارکیٹ میں بھی روئی کے بھاؤ میں اضافہ ہوگیا۔

انہوں نے بتایا کہ ڈالر کے بھاؤ میں اضافے کی وجہ سے روئی کی درآمد مہنگی ہوجائے گی جبکہ بھارت میں روئی کی پیداوار کم ہونے اور گلابی سنڈی کے شدید حملے کی وجہ سے فصل خراب ہونے کی وجہ سے بھارت سے روئی کی درآمد بھی مشکل ہوگئی ہے جس کے باعث مقامی ملز نے کوالٹی کاٹن ہاتھ کرنے کے لیے بھاؤ میں اضافہ کردیا۔ اس سال ملک میں کپاس کی پیداوار کم ہونے کی بھی ایک وجہ بتائی جاتی ہے ملک میں کپاس کی پیداوار ابتدائی تخمینہ ایک کروڑ 41 لاکھ گانٹھوں کے نسبت 25 تا 30 لاکھ گانٹھوں کی کم پیداوار تقریبا ایک کروڑ 10 تا 15 لاکھ گانٹھیں ہونے کی توقع ہے۔

دوسری جانب ماہرین کا خیال ہے کہ ڈالر کی قیمت میں مزید اضافہ ہونے کی صورت میں روئی کے بھاؤ میں مزید اضافہ ہوسکتا ہے۔ روئی کے بھاؤ میں ہوشربا اضافے کے سبب مقامی ٹیکسٹائل سیکٹر بحرانی کیفیت میں آگیا ہے کیوں کہ کاٹن یارن اور ٹیکسٹائل مصنوعات کی قیمتیں اس نسبت سے نہیں بڑھی ہیں بلکہ ڈالر کے بھاؤ میں اضافے کے باعث ملز کے لیے گو کہ برآمد میں اضافہ ہوگا لیکن درآمد کی جانے والی اشیا کی درآمد مہنگی ہوجائے گی جس کے باعث پیداواری لاگت بڑھ جائیگی۔