حدیبیہ کیس میں سپریم کورٹ نے شریف خاندان پر ہلکا ہاتھ رکھا اعتزاز احسن

جب حدیبیہ جیسے فیصلے آئیں گے تو عدالتوں پر عوام کا اعتماد کم ہوگا، اعتزازاحسن

ویب ڈیسک December 18, 2017

جب حدیبیہ جیسے فیصلے آئیں گے تو عدالتوں پر عوام کا اعتماد کم ہوگا، اعتزازاحسن فوٹو : فائل

پیپلزپارٹی کے رہنما سینیٹر اعتزاز احسن کا کہنا ہے کہ حدیبیہ کیس میں شریف خاندان کو بہت چھوٹ ملی سپریم کورٹ نے ہلکا ہاتھ رکھا جب کہ لاہور ہائی کا فیصلہ بھی غلط تھا۔

لاہور میں میڈیا سے بات کرتے ہوئے پیپلز پارٹی کے رہنما اعتزاز احسن کا کہنا تھا کہ حدیبیہ پیپر مل کیس پر شریف خاندان کو بہت بڑی چھوٹ ملی لیکن فوجداری مقدمے پر کوئی چھوٹ نہیں ملتی، قتل کے ملزم کو 20 سال بعد بھی سزا ملتی ہے اور آئین کے مطابق تفتیش اور فوجداری مقدمے کو روکا بھی نہیں جاسکتا، دیوانی مقدمات میں اپیل دائر کرنے کے لیے میعاد ہوتی ہے جب کہ فراڈ منی لانڈرنگ کیس میں کوئی زائدالمیعاد نہیں ہوتی۔

اس خبرکوبھی پڑھیں: نواز شریف قانونی ضابطوں کے بند کمرے میں پھنس گئے

اعتزاز احسن کا کہنا تھا کہ حدیبیہ کیس کے حوالے سے سپریم کورٹ کا فیصلہ بھی سمجھ سے بالاتر ہے، اعلیٰ عدلیہ نے شریف خاندان پر بہت ہلکا ہاتھ رکھا ہے، جب کہ لاہور ہائی کورٹ نے بھی غلط فیصلہ دیا۔ عدالتیں فیصلوں سے اعتماد قائم کرتی ہیں وضاحتوں سے نہیں، جب حدیبیہ جیسے فیصلے آئیں گے تو عدالتوں پر عوام کا اعتماد کم ہوگا۔ ان کا کہنا تھا کہ پی ٹی آئی رہنما جہانگیر ترین نے نااہلی کیس میں عدالت کو ساری منی ٹریل دی جب کہ نواز شریف نے تو ایک کاغذ بھی نہ دیا کیلیبری فونٹ اور قطری خط جھوٹ پر مبنی تھا۔

اس خبرکوبھی پڑھیں: الزام لگانا ن لیگ کی عادت بن چکی

رہنما پیپلزپارٹی نے کہا اقامہ تو ایک سنگین جرم ہے اقاموں کی بنیاد پر غیر ملکی خفیہ بینکوں میں پیسے رکھے جاتے ہیں، وزیراعظم آپ پاکستان کے ہوں اور ملازمت کہیں اور کرتے ہوں، بے نظیر بھٹو کی اسمبلی تحلیل کرنی ہوتو کرپشن کا الزام ہی کافی ہے جب کہ نواز شریف حکومت میں کرپشن ثابت ہوجائے تو اسمبلیاں تحلیل نہیں ہو سکتیں۔