پی آئی اے نے عمرہ زائرین کے لیے نئی سہولت کا آغاز کر دیا

زائرین پاکستان بھر سے جدہ اور مدینہ منورہ کیلیے پروازوں میں ایگزیکٹو اکانومی کلاس کی سہولت سے استفادہ کر سکیں گے۔

Staff Reporter December 19, 2017

زائرین پاکستان بھر سے جدہ اور مدینہ منورہ کیلیے پروازوں میں ایگزیکٹو اکانومی کلاس کی سہولت سے استفادہ کر سکیں گے۔ فوٹو : فائل

KARACHI: پی آئی اے نے عمرہ زائرین کے لیے اپنی پروازوں میں ایگزیکٹو اکانومی کلاس متعار ف کرا دی۔

ترجمان پی آئی اے کے مطابق عمرہ کے لیے سفر کرنے والے زائرین پاکستان بھر سے پی آئی اے کی جدہ اور مدینہ منورہ کیلیے پروازوں میں ایگزیکٹو اکانومی کلاس کی سہولت سے استفادہ کر سکیں گے۔ ایگزیکٹو اکانومی کلاس میں مسافروں کو بزنس کلاس کا کھانا فراہم کیاجائے گا جبکہ ان کو 5 کلو اضافی سامان بھی ساتھ لے جانے کی سہولت فراہم کی جارہی ہے۔

علاوہ ازیں پی آئی اے نے عمرہ زائرین کے لیے پاکستان سے اپنی شیڈول پروازوں کے علاوہ اضافی عمرہ پروازیں چلانے کا بھی اعلان کیا ہے۔ اگلے دوہفتوں کے دوران 4 اضافی پروازیں کراچی، 3 اسلام آباد، 2 لاہور اور ایک اضافی پرواز ملتان سے چلائی جا رہی ہے تاہم ان اضافی پروازں سے عمرہ زائرین کو حجاز مقدس کے سفر کے لیے نشستیں با آسانی دستیاب ہوں گی جب کہ اضافی پروازوں کے لیے بڑے طیارے استعمال کیے جارہے ہیں جن میں نشستوں کی تعداد زیادہ ہوتی ہے۔