یارسول اللہﷺ معاف فرما دیں

www.facebook.com/javed.chaudhry

---

آپ اگر قاہرہ سے اردن کی طرف سفر کریں تو آپ کو بحیرہ احمر کے پار ایک وسیع صحرا ملے گا' صحرا کی ایک سائیڈ پر بحیرہ روم' دوسری پر نہر سویز' تیسری طرف بحیرہ احمر اور چوتھی سائیڈ پر اسرائیل ہے'یہ صحرا سینا یا سنائی کہلاتا ہے' سینا کے جنوبی حصے میں طور نام کی ایک پہاڑی ہے' یہ پہاڑی ساڑھے سات ہزار فٹ بلند ہے۔

پندرہ سو قبل مسیح میں حضرت موسیٰ ؑ اپنی اہلیہ حضرت صفورا کے ساتھ کوہ طور کے قریب سے گزرے تھے' سردی تھی' آپؑ کو پہاڑ پر آگ نظر آئی' آپؑ نے اپنی اہلیہ کو رکنے کا حکم دیا اور آگ کی تلاش میں پہاڑ پر چڑھ گئے' حضرت موسیٰ ؑکو طور پر ایک جلتی ہوئی جھاڑی دکھائی دی' جھاڑی کے قریب پہنچے' آپؑ کو اللہ تعالیٰ کا جلوہ نظر آ یا اورآپؑ کو نبوت مل گئی' یہودیوں نے اس واقعے کے ہزار سال بعد جھاڑی کے گرد ایک عبادت گاہ بنا دی۔

حضرت عیسیٰ ؑتشریف لائے' یہ علاقہ عیسائی بادشاہوں کے قبضے میں آیا' رومن عیسائی بادشاہ قسطنطین نے 365ء میں یہاں ایک چھوٹا سا چرچ (چیپل) بنا دیا' چیپل کی تعمیر کے دو سو سال بعد 565ء میں رومن بادشاہ سیزر جسٹینین نے یہاں ایک بڑی خانقاہ تعمیر کر دی' یہ خانقاہ سینٹ کیتھرائن کہلاتی ہے' یہ آج تک سلامت ہے۔

حضرت موسیٰ ؑکی جلتی ہوئی جھاڑی اسی خانقاہ میں موجود ہے' سینٹ کیتھرائن کی لائبریری دنیا کی دوسری قدیم ترین لائبریری ہے' لائبریری میں دنیا کی قدیم دستاویز موجود ہے' ان دستاویز میں نبیؐ اکرمؐ کا ایک خط مبارک بھی شامل ہے' خط پر آپؐ کے دست مبارک کا نشان ہے' عیسائی اس خط کو نبی اکرمؐ کا Testament Covenant جب کہ مسلمان عہد نامہ کہتے ہیں' یہ دنیا میں واحد ایسی دستاویز ہے جس پررسول اللہﷺ کے دست مبارک کا نشان موجود ہے۔

مصر تاریخ کے مختلف ادوار میں مختلف خلفاء کے قبضے میں رہا' یہ چرچ بھی ان ادوار میں مسلمانوں کے زیر نگین رہا لیکن خلفاء راشدین ہوں' بنو امیہ کا دور ہو' عباسیوں اور فاطمیوں کا عہد ہو' سلطان صلاح الدین ایوبی کا زمانہ ہو یا پھر عثمانی خلافت ہو' اسلامی ریاست کے ہر دور میں یہ چرچ بھی محفوظ رہا اور یہ عہد نامہ بھی' مسلمان حکمران بدلتے رہے لیکن ہر حکمران نے اس عہد نامے کا احترام بھی کیا اور اس کی تصدیق بھی' یہ معاہدہ ''تاریخ سینا القدیم'' جیسی معتبر کتاب میں بھی موجود ہے۔

عثمانی خلیفہ سلیم اول نے 1516ء میں مصر فتح کیا' سلیم اول نے فتح کے بعد نہ صرف اس عہدنامے کی تصدیق کی بلکہ عثمانیوں کے گورنر (پاشا آف مصر) ہر سال عہد نامے کی تصدیق اور معائنے کے لیے سینٹ کیتھرائن بھی جاتے تھے' یہ تصدیق نامے بھی آج تک چرچ کی لائبریری میں موجود ہیں۔

یہ عہد نامہ کیا ہے اور یہ کیوں کیا گیا؟ اس کے بارے میں مختلف روایات ہیں' ایک روایت کے مطابق خانقاہ سینٹ کیتھرائن کے چند متولی مدینہ آئے' نبی اکرمؐ نے ان کی میزبانی فرمائی' متولیوں نے رخصت ہونے سے پہلے عرض کیا'ہمیں خطرہ ہے مسلمان جب طاقتور ہو جائینگے تو یہ ہمیں قتل اور ہماری عبادت گاہوں کو تباہ کر دینگے' آپؐ نے جواب دیا' آپ لوگ مجھ سے اور میری امت کے ہاتھوں سے محفوظ رہیں گے' متولیوں نے عرض کیا' ہم لوگ جب بھی کسی سے معاہدہ کرتے ہیں تو ہم وہ لکھ لیتے ہیں' آپ بھی ہمیں اپنا عہد تحریر فرما کر عنایت کر دیں تاکہ ہم مستقبل میں آپ کے امتیوں کو آپؐ کی یہ تحریر دکھا کر امان حاصل کر سکیں۔

آپؐ نے تحریر لکھوائی' تصدیق کے لیے کاغذ پر اپنے دست مبارک کا نشان لگایا اور عہدنامہ ان کے حوالے کر دیا' وہ لوگ واپس آئے اور یہ معاہدہ سینٹ کیتھرائن میں آویزاں کر دیا' مسلمان حکمرانوں نے اس کے بعد جب بھی مصر فتح کیا اور یہ سینا اور کوہ طور تک پہنچے تو خانقاہ کے متولی نبی اکرمؐ کا عہد نامہ لے کر گیٹ پر آ گئے' فاتحین نے عہد نامے کو بوسا دیا' خانقاہ اور مصر کے عیسائیوں کو پناہ دی اور واپس لوٹ گئے' وہ عہد نامہ کیا تھا' میں اس کا ترجمہ آپ کی نذر کرتا ہوں۔

''یہ خط رسول اللہ ﷺ ابن عبداللہ کی جانب سے تحریر کیا گیا ہے جنھیں اللہ کی طرف سے مخلوق پر نمائندہ بنا کر بھیجا گیاتاکہ خدا کی طرف کوئی حجت قائم نہ ہو' بیشک اللہ قادر مطلق اور دانا ہے' یہ خط اسلام میں داخل ہونیوالوں کے لیے ہے' یہ معاہدہ ہمارے اوردور و نذدیک' عربی اور عجمی' شناسا اور اجنبی' عیسائیوں اور حضرت عیسیٰ ؑکے پیروکاروں کے درمیان ہے' یہ خط ایک حلف نامہ ہے اور جو اس کی خلاف ورزی کرے گا' وہ کفر کریگا' وہ اس حکم سے روگردانی کا راستہ اختیار کریگا' معاہدے کی خلاف ورزی کرنے والا خدا اور اس کے حکم کا نافرمان ہو گا۔

اس (خط ) حکم کی نافرمانی کرنیوالا بادشاہ یا عام آدمی خدا کے قہر کا حق دار ہوگا' جب کبھی عیسائی عبادت گزار اور راہب ایک جگہ جمع ہوں' چاہے وہ کوئی پہاڑ ہو یا وادی' غار ہو یا کھلا میدان' کلیساء ہو یا گھر میں تعمیر شدہ عبادت گاہ ہو تو بیشک ہم (مسلمان) ان کی حفاظت کے لیے ان کی پشت پر کھڑے ہونگے' میں' میرے دوست اور میرے پیروکار ان لوگوں کی جائیدادوں اور ان کی رسوم کی حفاظت کرینگے' یہ (عیسائی) میری رعایا ہیں اور میری حفاظت میں ہیں' ان پر ہر طرح کا جزیہ ساقط ہے جو دوسرے ادا کرتے ہیں' انھیں کسی طرح مجبور' خوفزدہ' پریشان یا دباؤ میں نہیں لایا جائے گا۔

ان کے قاضی اپنے فیصلے کرنے میں آزاد ہیں' ان کے راہب اپنے مذہبی احکام اور اپنی رہبانیت کے مقامات میں آزاد ہیں' کسی کو حق نہیں یہ ان کو لوٹے' ان کی عبادت گاہوں اور کلیساؤں کو تباہ کرے اور ان (عمارتوں) میں موجود اشیاء کو اسلام کے گھر میں لائے' جو ایسا کرے گا وہ اللہ اور اس کے رسول ﷺ سے حلف کی خلاف ورزی کریگا' ان کے قاضی' راہب اور عبادتگاہوں کے رکھوالوں پر بھی جزیہ نہیں ہے' ان سے کسی قسم کا جرمانہ یا ناجائز ٹیکس وصول نہیں کیا جائے گا۔

بیشک میں ان سے وعدے کی پاسداری کروں گا' چاہے یہ زمین میں ہیں یا سمندر میں' مشرق میں ہیں یا مغرب میں' شمال میں ہیں یا جنوب میں' یہ میری حفاظت میں ہیں' ہم اپنے مذہبی خدا کی عبادت میں زندگی وقف کرنیوالوں (راہبوں) اور اپنی مقدس زمینوں کو زرخیز کرنیوالوں (چرچ کے زیر انتظام زمینوں) سے کوئی ٹیکس یا آمدن کا دسواں حصہ نہیں لیں گے۔

کسی کو حق نہیں کہ وہ ان کے معاملات میں دخل دے یا ان کے خلاف کوئی اقدام کرے' ان کے زمیندار' تاجر اور امیر لوگوں سے لیا جانے والا ٹیکس 12 درہم(Drachma) سے (موجودہ 200 امریکی ڈالر) سے زائد نہیں ہو گا' ان کو کسی طرح کے سفر (نقل مکانی) یا جنگ میں حصہ لینے (فوجی بھرتی) پر بھی مجبور نہیں کیا جائے گا' کوئی ان سے جھگڑا یا بحث نہ کرے۔

ان سے قرآن کے احکام کے سوا کوئی بات نہ کرو ''اور اہل کتاب سے نہ جھگڑو مگر ایسے طریقے سے جو عمدہ ہو'' (سورۃ العنکبوت آیت 46) پس یہ مسلمانوں کی جانب سے ہر طرح کی پریشانی سے محفوظ ہیں' چاہے یہ عبادت گاہ میں ہیں یا کہیں اور 'کسی عیسائی عورت کی مسلمان سے اس کی مرضی کے خلاف شادی نہیں ہو سکتی' اس کو اس کے کلیساء جانے سے نہیں روکا جا سکتا' ان کے کلیساؤں کا احترام ہو گا' ان کی عبادت گاہوں کی تعمیر یا مرمت پر کوئی پابندی نہیں ہو گی اور انھیں ہتھیار اٹھانے پر مجبور نہیں کیا جائے گا۔ ہر مسلمان پر لازم ہے کہ وہ قیامت تک اور اس دنیا کے اختتام تک اس حلف کی پاسداری کرے''۔عہد نامے کے نیچے نبی اکرم ؐ کے دست مبارک کا نقش ہے' یہ نقش رسول اللہ ﷺ کے دستخط کی حیثیت رکھتا ہے۔

مسلمانوں نے 1400 سال کی تاریخ میں اس عہد نامے کا احترام کیا' ہم نے ان برسوں میں کسی چرچ پر حملہ کیا' کوئی راہب قتل کیا اور نہ ہی کسی کلیساء کی زمین پر قبضہ کیا حتیٰ کہ صلیبی جنگوں کے دوران بھی اس معاہدے پر عمل ہوتا رہا' حضرت عمر فاروقؓ نے بیت المقدس کی فتح کے بعد کلیساء میں نماز پڑھنے سے انکار کر دیا تھا' حضرت امیر معاویہؓ کے دور میں دمشق کے تمام چرچ اور عیسائی محفوظ رہے۔

اموی خلفاء نے جامعہ امیہ بنانے کا فیصلہ کیاتو عیسائیوں سے چرچ کی زمین باقاعدہ خریدی بھی گئی اور انھیں پورے دمشق میں ''جہاں چاہیں اور جتنے چاہیں'' چرچ بنانے کی اجازت بھی دی گئی' اسپین میں بھی آٹھ سو سال عیسائی اور چرچ محفوظ رہے' مسجد قرطبہ میں چرچ کی زمین کا تھوڑا سا حصہ آ گیا تھا' خلیفہ نے تعمیر رکوا کر پادری سے باقاعدہ اجازت لی اور معاوضہ ادا کیا' سعودی عرب' عراق' مصر' ترکی' فلسطین' ایران اور سینٹرل ایشیا میں آج بھی پونے دو ہزار سال پرانے چرچ موجود ہیں' یہ چرچ ان ادوار میں بھی سلامت رہے جب مسلمان مسلمان کی خانقاہیں گرا دیتے تھے' جب مسلمانوں کے ہاتھوں مسلمان قتل ہو جاتے تھے۔

امیر تیمور نے 58 اسلامی ممالک کی اینٹ سے اینٹ بجا دی مگر کلیساء محفوظ رہے لیکن آج رسول ﷺ کے عاشقوں کے پاکستان میں عیسائی محفوظ ہیں اور نہ ہی ان کے چرچ'کیوں؟ میں 17 دسمبرکو کوئٹہ کے چرچ پر حملے کی فوٹیج دیکھ رہا تھا' ایک چھوٹی سی مسیحی پاکستانی بچی روتے ہوئے کہہ رہی تھی ''انکل مجھے بہت درد ہو رہا ہے'' میری آنکھوں میں آنسو آ گئے' میں نے رسول اللہ ﷺ کا عہد نامہ نکالا' اسے بوسہ دیا اور نم ناک آواز میں عرض کیا ''یا رسول اللہ ﷺ' ہم شرمندہ ہیں' ہمیں معاف فرما دیں' آپؐ کی امت میں اب امتی نہیں ہیں صرف عاشق ہیں اور عاشق احکامات مانا کرتے ہیں اور نہ ہی عہد''۔

نوٹ: آپ رسول اللہ ﷺ کا عہدنامہ دیکھنے کے لیے اس لنک پر کلک کریں۔

http://javedch.com/

javed-chaudhry-urdu-columns

/2017/12/24/396568