کراچی سپر ہائی وے پر پولیس مقابلہ داعش کے 5 دہشتگرد ہلاک

راؤ انوار اب تک سپر ہائی وے سے ملحقہ علاقے میں درجنوں دہشتگردوں کو ہلاک کرچکے ہیں فوٹو: فائل

---

KARACHI: سپر ہائی وے پر پولیس مقابلے کے دوران فائرنگ کے تبادلے میں داعش کے 5 دہشت گرد ہلاک ہوگئے۔

ایس ایس پی کراچی ملیر راؤ انوار کے مطابق پولیس نے سپر ہائی وے پر واقع ایوب گوٹھ میں خفیہ اطلاعات پر چھاپہ مارا تو وہاں موجود دہشت گردوں نے پولیس پر فائرنگ کے ساتھ ساتھ دستی بموں سے حملہ کردیا۔ جوابی کارروائی میں 5 دہشت گرد ہلاک ہوگئے ہیں۔

ایس ایس پی راؤ انوار کا کہنا ہے کہ ہلاک دہشت گردوں کا تعلق داعش سے تھا اور ایک دہشت گرد کی شناخت قاری حبیب اللہ عرف عبدالسلام کے نام سے ہوئی ہے، جب کہ فائرنگ کے تبادلے میں کسی پولیس اہلکار کو کوئی نقصان نہیں پہنچا، علاقے میں پولیس بدستور سرچ آپریشن کررہی ہے۔

واضح رہے کہ راؤ انوار اب تک سپر ہائی وے اور اس سے ملحقہ علاقے میں کارروائی کے دوران درجنوں مبینہ دہشت گردوں کو ہلاک کرچکے ہیں۔