قومی اسنوکرآصف نے ابتدائی ناکامی کا ازالہ کردیا

خیبر پختونخوا کے رمبیل گل نے حیران کن طور پر محمد سجاد کو مات دے دی. فوٹو : فائل

---

اسنوکرکے ورلڈ چیمپئن محمد آصف نے قومی اسنوکر چیمپئن شپ کی ابتدائی ناکامی کا ازالہ کردیا۔

کراچی جیمخانہ میں جاری ایونٹ کے دوسرے دن انھوں نے عامر شہزاد کو 4-0 سے آؤٹ کلاس کردیا، ان کی جیت کا اسکور95-12،61-08،84-39 اور 58-51 رہا، پہلے دن آصف کو محمد اشتیاق کے ہاتھوں4-3 سے ناکامی کا منہ دیکھنا پڑا تھا، خیبر پختونخوا کے رمبیل گل نے محمد سجاد کو4-3 سے اپ سیٹ شکست دی۔



ابتدائی طور پر رمبیل دو فریمز کے خسارے میں تھے لیکن انھوں نے زبردست کم بیک کرتے ہوئے بازی پلٹ دی، رمبیل کو ابتدائی فریمز میں16-88 اور 27-72 سے ناکامی کا سامنا کرنا پڑا،انھوں نے تیسرا اور چوتھا فریم بالترتیب 83-43 اور 63-14 سے جیت کر مقابلے میں واپسی اختیار کی۔

پانچویں فریم میں محمد سجاد نے63-15 سے کامیابی پائی لیکن چھٹے فریم میں47-34 سے ملنے والی شکست نے ان کی برتری ختم کردی، ساتویں اور فیصلہ کن فریم میں رمبیل نے61-51 کے سنسنی خیز مقابلے کے بعد جیت کو اپنا مقدر بنالیا، عمران شہزاد نے پاکستان کے سابق نمبر2 سلطان محمد کو ہرادیا، سہیل شہزاد نے محمد عذیر پر4-2 سے کامیابی حاصل کی۔

پنجاب کے محمد جاوید کو بلوچستان کے عبدالرحمان کیخلاف 4-1 سے آسان فتح ملی، دوسرے دن کا بہترین میچ شرجیل محمود اور فرحان نور کے درمیان رہا، دونوں پلیئرز کے درمیان کانٹے دار مقابلہ ہوا لیکن جیت شرجیل کو 4-3 سے ملی، عامر رشید نے شفیع اللہ کو4-0 سے زیر کرلیا۔