نگراں وزیر اعظم کی تقرری کا فیصلہ اب پارلیمانی کمیٹی کرے گی

نگراں وزیراعظم کی تقرری کے لئے پارلیمانی کمیٹی کے باضابطہ قیام کا نوٹی فکیشن جاری کردیا گیا ہے۔

قومی اسمبلی سیکریٹریٹ کی جانب سے جاری کئے گئے نوٹی فکیشن کے مطابق 8 رکنی پارلیمانی کمیٹی میں دونوں فریقین کی جانب سے 4 ،4 ارکان شامل کئے گئے ہیں جو آئندہ دو روز میں نگراں وزیر اعظم کی تقرری کے لئے اتفاق کی کوشش کرے گا۔


پارلیمانی کمیٹی میں سابق حکومت کی جانب سے فاروق ایچ نائیک، سید خورشید شاہ، مسلم لیگ (ق) کے صدر چوہدری شجاعت حسین اور عوامی نیشنل پارٹی کے غلام احمد بلور شامل ہیں جبکہ مسلم لیگ (ن) کے سردارمہتاب عباسی،خواجہ سعد رفیق، سینیٹر پرویز رشید اور سردار یعقوب ناصر شامل ہوں گے ۔

آئین کے مطابق اگر وزیر اعظم راجہ پرویز اشرف اور چوہدری نثار علی خان آج رات 12 بجے تک نگراں وزیر اعظم کے نام پر متفق نہ ہوسکے تو پھر معاملہ پارلیمانی کمیٹی کے پاس جائے گا جسے 22 مارچ تک نگراں وزیراعظم کا فیصلہ کرنا ہوگا، دوسری صورت میں نگراں وزیر اعظم کے انتخاب کا اختیار الیکشن کمیشن کے پاس منتقل ہوجائے گا جوکہ آئندہ 2 دن یعنی 23 اور24 مارچ کو نگراں وزیراعظم کا فیصلہ کرنے کاپابند ہوگا۔