35 اشیا کی درآمد پر ریگولیٹری ڈیوٹی 5 تا 20 فیصد کم

رجسٹرڈصنعتوں،فوڈوکنفیکشنرزکیلیے پیکنگ میٹریل کے خام مال پربھی ڈیوٹی گھٹا دی گئی،ایف بی آرنے نوٹیفکیشن جاری کردیا۔ فوٹو؛ فائل

---

وفاقی حکومت کی جانب سے 35 اشیا کی درآمد پر عائد ریگولیٹری ڈیوٹی کی شرح میں 5 سے 20 فیصد تک کمی کردی گئی ہے۔

وفاقی حکومت کی جانب سے 35 اشیا کی درآمد پر عائد ریگولیٹری ڈیوٹی (آرڈی) کی شرح میں 5 سے 20 فیصد تک کمی کردی گئی ہے جبکہ ایئر کنڈیشنر، مائیکروویو اوون، پی ڈی پی، ایل سی ڈی، ایل ای ڈی ٹی وی سمیت دیگر ہوم اپلائنسز کی سی کے ڈی کنڈیشن میں درآمد پر آرڈی ختم کردی گئی ہے جس کے لیے فیڈرل بورڈ آف ریونیو(ایف بی آر) کی جانب سے گزشتہ روز باضابطہ طور پر نوٹیفکیشن نمبر 06(I)/2018 جاری کردیا گیا ہے۔

اس نوٹیفکیشن کے ذریعے فیڈرل بورڈ آف ریونیو نے 16اکتوبر 2017کو جاری کردہ ایس آر او نمبر1035(I)/2017 میں ترامیم کی ہیں، جن اشیا کی درآمد پر ریگولیٹری ڈیوٹی کم کی گئی ہے ان میں کوکا پاؤڈر، سلفونک ایسڈ، پولیمر بیگ، جوتوں کی تیاری میں استعمال ہونے والا خام مال و پارٹس، لائٹ فٹنگ و فکسڈ ایل ای ڈی، ایس ایم ڈی، فوڈ و ڈیری پروڈکٹس کی پیکنگ کے لیے استعمال ہونے والے پولیمر کے بیگ اور باردانہ سمیت دیگر خام مال شامل ہیں۔

نوٹیفکیشن کے مطابق کوکا پاؤڈر کی درآمد پر ریگولیٹری ڈیوٹی 20فیصد سے کم کر دی گئی ہے۔ سلفونک ایسڈ اور 3 مختلف اقسام کے دوسرے خام مال کی درآمد پر 20 فیصد سے کم کرکے 10، جوتا سازی میں استعمال ہونے والے پارٹس کی درآمد پر عائد ریگولیٹری ڈیوٹی 25 فیصد سے کم کرکے 15فیصد، لائٹنگ فٹنگ اور فکسڈ ایل ای ڈی لائٹ و ایس ایم ڈی لائٹ پر ریگولیٹری ڈیوٹی کی شرح 20فیصد سے کم کر کے 10فیصد جبکہ پولیمر بیگ اور باردانہ پر عائد ریگولیٹری ڈیوٹی کی شرح 10 فیصد سے کم کرکے 5 فیصدکردی گئی ہے۔

نوٹیفکیشن میں بتایا گیاکہ ایئرکنڈیشنر، مائیکرو ویو اوون، پی ڈی پی، ایل سی ڈی، ایل ای ڈی ٹی وی، الیکٹرومکینیکل گھریلو اپلائنسز، الیکٹرک اسٹوریج واٹر ہیٹر کی سی کے ڈی کنڈیشن میں درآمد پر ریگولیٹری ڈیوٹی عائد نہیں ہوگی تاہم ان اشیا کی کمپلیٹ بلٹ یونٹ (سی بی یو) کنڈیشن میں درآمد پر مروجہ شرح کے حساب سے ریگولیٹری ڈیوٹی عائد ہوگی.

اس کے علاوہ ایف بی آر نے رجسٹرڈ صنعتی یونٹس اوررجسٹرڈ فوڈ و کنفیکشنری انڈسٹری کے لیے پیکنگ میٹریل کے خام مال کی درآمد پر بھی ریگولیٹری ڈیوٹی کی شرح کم کردی ہے۔