ایم کیو ایم نے پرویزمشرف کے ساتھ الحاق یا سیٹ ایڈجسٹمنٹ کی خبروں کو مسترد کردیا

پرویز مشرف نے آئندہ انتخابات میں حصہ لینے کے لئے 24 مارچ کو وطن واپس آنے کا اعلان کررکھا ہے۔ فوٹو: فائل

---

متحدہ قومی موومنٹ کی رابطہ کمیٹی نے سابق صدر پرویز مشرف کی جماعت کے ساتھ کسی بھی الحاق یا سیٹ ایڈجسٹمنٹ کی خبروں کو یکسر مسترد کر دیا ہے۔

متحدہ قومی موومنٹ کی جانب سے جاری کئے گئے اعلامیے میں کہا گیا کہ ایم کیو ایم نے سابق صدر مشرف یا ان کی جماعت آل پاکستان مسلم لیگ سے کسی بھی قسم کے الحاق یا سیٹ ایڈجسٹمنٹ کا کوئی معاہدہ نہیں کیا اور اس حوالے سے میڈیا میں جو خبریں گردش کر رہی ہیں وہ بے بنیاد اورگمراہ کن ہیں۔

واضح رہے کہ پرویز مشرف نے آئندہ انتخابات میں حصہ لینے کے لئے 24 مارچ کو وطن واپس آنے کا اعلان کرتے ہوئے کہا تھا کہ وہ وطن واپسی پرراولپنڈی یا کراچی کے ایئرپورٹ پر اتریں گے اوریہ بھی خیال کیا جارہا ہے کہ وہ کراچی کی کسی نشست سے قومی اسمبلی کا انتخاب بھی لڑسکتے ہیں۔