ایف بی آر کا کشمیری ٹیکس اتھارٹی کو سسٹم تک رسائی دینے پر اتفاق

سیل ٹیکس ریئل ٹائم انوائس ویریفکیشن،آئی آر آئی ایس ریٹرن فائلنگ سسٹم تک رسائی کاطریقہ کاروضع کرنیکاکام پرال کے سپرد

شبیر حسین January 08, 2018

باہم لنک نہ ہونے پرٹیکس گزاروں کے نام ایکدوسرے کی ایکٹیو ٹیکس پیئرلسٹ میں شامل نہیں ہوتے تھے اورانہیں دہرا ٹیکس اداکرناپڑتا تھا۔ فوٹو : فائل

فیڈرل بورڈ آف ریونیو نے آزاد کشمیرکی ٹیکس اتھارٹی اور ٹیکس دھندگان کو ایف بی آرکے سیل ٹیکس ریئل ٹائم انوائس ویریفکیشن اورآئی آر آئی ایس ریٹرن فائلنگ سسٹم تک رسائی دینے پر اتفاق کرلیا ہے۔

ایف بی آر کے سیل ٹیکس ریئل ٹائم انوائس ویری فیکیشن اورآئی آر آئی ایس ریٹرن فائلنگ سسٹم تک رسائی ملنے کے بعد آزاد کشمیر کے ٹیکس اتھارٹیز اور ٹیکس دہندگان نہ صرف ایف بی آر کے ایکٹیو ٹیکس پیئر لسٹ میں شامل ہوں گے بلکہ ان نظام کے ذریعے براہ راست ایف بی آر کو سیل ٹیکس اور انکم ٹیکس ریٹرن فائل کر سکیں گے۔

ذرائع نے بتایا کہ آزاد کشمیر کی ٹیکس اتھارٹی اور ٹیکس دہندگان کو فیڈرل بورڈ آف ریونیو کے انکم اور سیل ٹیکس نظام تک رسائی دینے کے لیے طریقہ وضع کرنے کا کام پاکستان ریونیوآٹومیشن لمیٹڈ کو سونپ دیا گیا ہے جو اس ضمن میں طریقہ کار کو حتمی شکل دے کر ایف بی آر کو جمع کرائے گی تاکہ فیڈرل بورڈ آف ریونیو اور آزاد کشمر کے ٹیکس ادارے ایک دوسرے کے رہائشیوں کے بارے میں ٹیکس وصولی کا ڈیٹا اور ریکارڈ چیک کرکے ود ہولڈنگ ٹیکس کا تعین کرسکیں اور ٹیکس دہندگان کو ایف بی آر اورآزادکشمیر کے ٹیکس اتھارٹیزکو الگ الگ ٹیکس گوشوارے جمع کروانے کی مشکلات سے بچ سکیں۔

آزاد کشمیر میں ٹیکس وصولی کیلیے الگ اتھارٹی قائم ہیں اور یہ اتھارٹی آزادکشمیرکونسل کے ماتحت کام کرتی ہے جبکہ فیڈرل بورڈ آف ریونیوکا ٹیکس وصولی کا اپنا الگ نظام ہیں۔ دونوں ٹیکس نظام میں کوئی لنک نہ ہونے کے باعث پاکستان میں ٹیکس دینے والے کمپنیوں اور ٹیکس دہندگان کے نام آزاد کشمیر کے ایکٹیو ٹیکس پیئر کی لسٹ میں شامل نہیں ہوتے تھے۔ اسی طرح آزادکشمیر میں ٹیکس ادا کرنے والے کمپنیوں اور ٹیکس دہندگان فیڈرل بورڈ آف ریونیو کے پاس موجودایکٹیو ٹیکس پیئر لسٹ میں شامل نہیں ہوتے تھے۔

ذرائع نے بتایا کہ اس کے باعث پاکستان میں ٹیکس پیئر کمپنیوں کو آزاد کشمیر میں نان فائلر قرار دیتے ہوئے ان سے زیادہ ٹیکس وصول کیے جارہے تھے۔ اسی طرح آزاد کشمیر کے ٹیکس فائلر کو پاکستان کے ایکٹیو ٹیکس پیئر کی لسٹ میں شامل نہ ہونے کے باعث نان فائلر قرار دے کر زیادہ ٹیکس وصولیاں کی جارہی تھی۔

واضح رہے کہ اس معاملے کو وزیر اعظم کے سامنے اٹھایا گیا تھا جس پر وزیر اعظم نے وفاقی سیکریٹری خزانہ کی سربراہی میں چیئرمین ایف بی آر اور چیف سیکریٹری آزاد کشمیر پر مشتمل تین رکنی کمیٹی قائم کی تھی۔ چند روز قبل کمیٹی کااہم اجلاس منعقد ہوا ہے جس میں اتفاق کیا گیا ہے کہ فیڈرل بورڈ آف ریونیو آزاد کشمیر کے ٹیکس اتھارٹیز اور ٹیکس دھندگان کو ایف بی آر کے سیل ٹیکس ریئل ٹائم انوائس ویری فیکیشن اورآئی آر آئی ایس ریٹرن فائلنگ سسٹم تک رسائی دے گی۔

ایف بی آر کے سیل ٹیکس ریئل ٹائم انوائس ویری فیکیشن اورآئی آر آئی ایس ریٹرن فائلنگ سسٹم تک رسائی ملنے کے بعد آزاد کشمیر کے ٹیکس اتھارٹیز اور ٹیکس دہندگان براہ راست ایف بی آر کو سیل ٹیکس اور انکم ٹیکس ریٹرن فائل کر سکیں گے۔

اس ضمن میں پاکستان ریونیو آٹومیشن لمیٹڈ کو ہدایات کی گئی ہیں کہ وہ آزاد کشمیر کے ٹیکس اتھارٹیز اور ٹیکس دہندگان کو فیڈرل بورڈ آف ریونیو کے انکم اور سیل ٹیکس نظام تک رسائی دینے سے متعلق طریقہ کار کو حتمی شکل دے کر رپورٹ جمع کرائے تاکہ فیڈرل بورڈ آف ریونیو اور آزاد کشمیر کے ٹیکس ادارے ایک دوسرے کے رہائشیوں کے بارے میں ٹیکس وصولی کا ڈیٹا و ریکارڈ چیک کرکے ود ہولڈنگ ٹیکس کا تعین کرسکیں اور ٹیکس دہندگان کو ایف بی آر اور آزاد کشمیر کے ٹیکس اتھارٹیز کو الگ الگ ٹیکس گوشوارے جمع کروانے کی مشکلات سے بچ سکیں۔