وارم اپ میچ قومی انڈر 19 نے نمیبیا کو 190 رنز سے ہرا دیا

ہدف کے تعاقب میں نمیبیا کی ٹیم 107 رنز پر پویلین لوٹ گئی،فوٹو:سوشل میڈیا

---

ISLAMABAD: جونیئر ورلڈکپ سے قبل وارم اپ میچ میں پاکستان نے نمیبیا کو 190 رنز سے شکست دیدی، محسن خان نے سینچری اسکور کی، محمد طحٰہ نے برق رفتار ففٹی کے ساتھ 3 وکٹیں بھی اڑائیں۔

کرائسسٹ چرچ میں کھیلے گئے میچ میں گرین شرٹس نے ٹاس جیت کر بیٹنگ کا فیصلہ کیا، اوپنر زید عالم (1) رچرڈ ٹرپائی کی گیند پر لوفٹی ایٹن کو کیچ دے بیٹھے، روحیل نذیر (18) کی وکٹیں بھی ٹرپائی نے اڑائیں، عماد عالم 7 کو شان فوچے نے وکٹ کیپر مچل ہے کا کیچ بنوا دیا، محمد محسن خان اور علی زریاب آصف نے اچھی شراکت قائم کرتے ہوئے مجموعہ 171 تک پہنچایا، محسن خان 114 گیندوں پر 14 چوکوں کی مدد سے 102 رنز کی اننگز کھیلنے کے بعد ریٹائر ہو گئے۔

ان کے بعد آنے والے علی زریاب آصف 59 گیندوں پر 51 رنز کی اننگز کھیلنے کے بعد میٹ ہے اور لوفٹی ایٹن کے گٹھ جوڑ کا شکار بنے، سعد خان (7) کو جان ایزاک ڈی ویلیئرز نے بولڈ کر دیا، شاہین آفریدی (1) میٹ ہے کی گیند پر وکٹوں کے پیچھے کیچ دے بیٹھے، محمد طحٰہ نے 36 گیندوں پر 4 چھکوں اور 3 چوکوں کی مدد سے 56 رنز کی اننگز کھیلی، انہیں ڈی ویلیئرز نے بولڈ کیا، محمد موسیٰ (28) اور سلیمان شفقات (14) بھی پیسر کا شکار بنے، پاکستان نے مقررہ اوورز میں وکٹوں کے نقصان پر 297 رنز بنائے، نمیبیا کی جانب سے جان ایزاک ڈی ویلیئرز نے 4، رچرڈ ٹرپائی اور میٹ ہے نے 2,2 جبکہ شان فوچے نے ایک وکٹ حاصل کی۔

ہدف کے تعاقب میں نمیبیا کی پوری ٹیم 30.3 اوورز میں 107 رنز پر پویلین لوٹ گئی، میٹ ہے 34، لیام فوکس 18، لوفٹی ایٹن اور ڈی ویلیئرز 15,15 جبکہ عمران شاہ 10 رنز بنا سکے، اس کے علاوہ کوئی بیٹسمین ڈبل فیگرز میں داخل نہ ہو سکا، محمد طحٰہ نے 12 اور شاہین آفریدی نے 18 رنز کے عوض 3,3 شکار کیے، محمد موسیٰ نے 2 جبکہ ارشد اقبال نے ایک وکٹ حاصل کی۔ دیگر وارم اپ میچز میں افغانستان نے بنگلا دیش کو 56 رنز سے ہرا دیا، ویسٹ انڈیز نے پاپوا نیوگینی کے خلاف 7 وکٹ سے کامیابی سمیٹی جبکہ میزبان نیوزی لینڈ نے زمبابوے کو 52 رنز سے زیر کیا۔

It's only our first day of warm-up games and #U19CWC already has its first century with Muhammad Mohsin Khan of @TheRealPCB showing his class against Namibia 🇵🇰💯 pic.twitter.com/DPTDaZI3lv

— ICC Cricket World Cup (@cricketworldcup) January 8, 2018