مخالفین پنجاب حکومت پر کرپشن کا ایک بھی الزام ثابت نہ کرسکے شہباز شریف

وزیراعلی پنجاب شہباز شریف نے کہا ہے کہ مخالفین پنجاب حکومت پر کرپشن کا ایک بھی الزام ثابت نہیں کرسکے انہیں امید ہے کہ انتخابات صاف اورشفاف ہوں گے جسے قوم قبول کرے گی۔


لاہور میں میڈیا کے نمائندوں سے بات کرتے وزیراعلیٰ پنجاب شہباز شریف نے کہا کہ صدر آصف زرداری نے پاک ایران گیس پائپ لائن پر قوم سے ایک اور دھوکا کیا اوریہ وقت آنے پر اس کی حقیقت قوم پر واضح ہوجائے گی۔ انہوں نے کہا کہ بدترین سیلاب آئے لیکن صدرآصف زرداری لندن اور پیرس میں ٹھنڈی ہواؤں کے مزے لیتے رہے۔

شہباز شریف نے میڈیا کا شکریہ ادا کرتے ہوئے کہا کہ آپ نے ان 5 سالوں میں ہمارا ساتھ دیتے ہوئے مثبت انداز اختیار کیا، اور میں نے ہمیشہ میڈیا کی تنقید سے رہنمائی حاصل کی۔ انہوں نے کہا کہ ٹرانسپیرنسی انٹرنیشل نے نہ صرف میٹرو بس منصوبہ بلکہ لیب ٹاپ اور اجالا اسکیم منصوبوں کو بھی کرپشن سے پاک قراردیا جس کی وجہ سے ہم عوام کی عدالت میں سرخرو ہوگئے۔